Yrysy tasyǵan yntymaqshyl aýyl

aqterektikter jańa kúndi jaqsy nyshanda qarsy aldy Biz es bilgeli Qońyrtóbeniń etegindegi Maıtóbe mamyr týysymen-aq máre-sáre bolyp jatýshy edi. Biraq keıingi jyldary mundaı sharalar kúrt azaıyp, Maıtóbege jınalmaǵaly da birshama ýaqyt bolǵan eken. «Toı – qazyna» dep baǵalaıtyn qazekeń bıylǵy Naýryzdy da óz deńgeıinde atap ótti. Ásirese, Almaty-Tashkent kúre jolynyń boıynda ornalasqan qambasy astyqqa, aýlasy malǵa tolǵan Aqterek aýyly buryn-sońdy bolmaǵan jaǵdaıda qarsy aldy. Oǵan muryndyq bolǵan – aýyl azamattarynyń bereke-birligi, yntymaǵy, osynda týyp-ósken jastardyń uıymshyldyǵy, sony serpilisi... Bıylǵy qystan aman-esen shyqqan aqterektikter qasıetti áz Naýryzǵa jyl­­­da­ǵydan erekshe daıyndaldy. Aýyl syrtyndaǵy Maıtóbeniń, ıaǵnı, qatar jatqan qos dóńniń birine shaǵyn sahna ornatyp, ekinshisine qaz-qatar aq­shańqan kıiz úıler tigip, altybaqan quryp, alaman báıgeniń sheńberin syzyp, avtoturaq pen onyń kúzetine deıin saqadaı-saı oılastyryldy. Sóıtip, Ulystyń uly kúngi ulan-asyr dýmanyna aýyldyń eńkeıgen kárisinen bas­tap eńbektegen balasyna deıin kóship barǵany azdaı, kórshi aýyldyń da shabarmandary, tolaǵaı myqty kúresker jigitteri, tipti Almatydan at arytyp jetken syıly qonaqtar men belgili óner juldyzdarynyń da birazy osynda. Naýryz toıǵa jınalǵandar bir-birin quttyqtap, kópten kórmegen aýyldastar ózara qaýqyldasyp máre-sáre. Jınalǵan jurtshylyq Naýryzdyń basty taǵamy – naýryzkójeden dám tatty. Bir aıta keterligi, aýyl aqsaqaldary men Aqterek sharýa qojalyǵynyń tóraǵasy, aýdandyq máslıhattyń depýtaty, eldiń kórkeıýine eleýli úles qosyp júrgen Temirlan Shaınúsipov jáne aýyl ákimi Ǵabıt Shortanbaevtyń bastamasyn azamattar aýyzbirshilik tanytyp qostady. Tipti, ózderi demeýshilik jasady. Sońǵy otyz jylda Aqterekten túlep ushqan azamattardyń biri kólik tikse, endi biri qarjylaı kómek kórsetip, el birligi úshin aıanyp qalmady. Úsh myńnan astam adam jınalǵan dúbirli toıda úsh shaqyrymdyq jaıaý báıge, taı, qunan, alaman báıge, teńge alý, qyz qýý, qazaqsha kúres, aýdaryspaq sııaqty ulttyq oıyn túrleri uıymdastyryldy. Ásirese, qoshqar kóterýden synǵa túsken jigitterdiń saıysy jınalǵandardyń delebesin qozdyrdy. Bul jarysta 70 kılolyq qoshqardy 47 ret kótergen Ke­nen Ázirbaev aýylynyń jigiti Meı­rambek Dálibaev jeńimpaz dep tanyldy. Alaman báıgege tigilgen avto­kólik te kórshi aýylǵa qaraı jol tartty. Osylaısha, qazaqy qaımaǵy buzyl­maǵan aýylda yzǵarly qystyń ketip, Samarqannyń kók tasy jibigen, ár jan ıesine úmit, jyly shyraı, nurly shýaq ákelip, yrystyń ydysyn toltyratyn Jańa kún – aqterektikterdiń bereke-birligin arttyratyndaı, keıingi urpaqqa ónege bolatyndaı deńgeıde atalyp ótti. Gúlzeınep SÁDIRQYZY, «Egemen Qazaqstan».