Sarbaz ómirin saqtap qalǵan

polkovnıktiń erligi erekshe baǵaǵa laıyq Beıbit kúnniń ózinde qarý atylyp, bomba jarylady. Beıbit kúnniń ózinde kózsiz erlikter jasalyp jatady. Qaraǵandy oblysyndaǵy áskerı bólimshelerdiń birinde bolǵan oqıǵa osyǵan kózdi taǵy bir márte jetkizdi. Oqys oqıǵa óńirdegi Qarabas kentinde oryn tepken №6505 áskerı bólimshesiniń oqý ortalyǵynda boldy. Qatardaǵy jaýynger Abzal Sultanqulov áskerı jattyǵý barysynda RGD-5 granatasyn nysanaǵa qaraı laqtyrýy tıis bolatyn. Alaıda, qaterli qarýdy qolyna alǵash ustaǵan sarbaz sasqalaqtap qalyp, laqtyrǵan granatasy okoptyń jıegine tıip, odan domalap baryp aıaǵynyń astyna túsken. Sol kezde sarbazdyń janynda turǵan polkovnık Qaırat Úmbetov shalt qımylmen jaýyngerdi ıterip jiberip, ony denesimen jaba ústine qulaǵan. Sol sátte granata da qara jerdi solq etkizip jarylǵan. Jarylystyń saldarynan Qaırat Úmbetov ıyǵynan jáne oń jaq aıaǵynyń tizeden tómen jerinen jaraqat aldy. Al, sarbaz Abzal Sultan­qulovtyń jambas tusyna jaryqshaq tıgen. Búgingi kúnde ekeýi de dárigerlerden tıisti kómekti aldy. Medısına mamandarynyń aıtýynsha, qudaı saqtap, ekeýiniń de jaraqaty jeńil bolǵan. Osy erligi úshin polkovnık memlekettik nagradaǵa usynyldy. Qaırat Úmbetovtiń áskerı qyz­­met­te júrgenine – 21 jyl. Bir jyldan beri №6505 áskerı bólimshesinde shtab basshysy bolyp qyz­met etedi. Otbasynda zaıyby ekeýi bir uldy tár­bıelep jatqan úlgili áke. «Men ózimdi batyrmyn dep sanamaımyn. Meniń istegenim – kez kelgen ofıserdiń moınyndaǵy kúndelikti mindet», – deıdi ol. Qaırat ÁBILDINOV, «Egemen Qazaqstan». QARAǴANDY.