QOSTANAI. 11 sáýir. Qostanaıda Qazaq KSR eńbek sińirgen kitaphanashysy, tarıh ǵylymdarynyń kandıdaty Názıra Dáýletovanyń 90 jyldyǵyna arnalǵan II «Dáýletova oqýlary» ótti. Bul týraly egemen.kz tilshisi habarlady.
Sharaǵa oblystaǵy aýdandar men qalalar kitaphanalary basshylary, mádenıet saasynyń qyzmetkerlerimen qatar Názıra Dáýletovanyń balalary men nemereleri, Ulttyq akademııalyq kitaphananyń (Almaty q.) bas mamandary qatysty. Kitaphana men kitaphanashy mamandyǵynyń qoǵamdaǵy róli men bedelin kóterý jáne Názıra Qojahmetqyzy Dáýletovanyń ǵylymı muralaryn nasıhattaý úshin 2014 jyly Dáýletova oqýlaryn ótkizý týraly sheshim qabyldanǵan bolatyn. Ol Qostanaıda ekinshi ret ótip otyr.
«Dáýletova oqýlary» konferensııasynda oblystyq mádenıet basqarmasynyń basshysy Larısa Seroýs, N.Dáýlettovanyń qyzy Ǵalııa Jaqııaqyzy, Respýblıkalyq ulttyq akademııalyq kitaphanasy aqparattyq-mádenı baǵdarlamalar qyzmetiniń menedjeri Muqıbek Aýyt quttyqtaý sóz sóıledi. Respýblıkalyq ulttyq akademııalyq kitaphanasynyń anyqtamalyq-aqparattyq qyzmet kórsetý qyzmetiniń jetekshisi Anar Rahımova Názıra Dáýletovanyń eńbegine sholý jasaı otyryp, elimizde kitaphana isin zamanaýı deńgeıge kóterýde kóp jumystar atqarǵan tulǵanyń basshy retindegi etıkasy men talap qoıǵyshtyǵy búgingi mádenıet salasy qyzmetkerlerine úlgi ekenin aıtty. Ol akademııalyq ulttyq kitaphana qorynan oblystyq ámbebap kitaphanaǵa sırek kitaptar syılady. Odan keıin L.Tolstoı atyndaǵy Qostanaı oblystyq ámbebap kitpahanasynyń dırektory Darıǵa Dúısebaeva oblys óńirindegi kitaphanalardyń Dáýletova dástúrin jalǵastyryp otyrǵan búgingi jumysyn baıandap berdi. Odan keıin Altynsarın memorıaldyq murajaıynyń qyzmetkeri Shektibaeva Názgúl, L.Tolstoı atyndaǵy oblystyq ámbebap kitaphanasynyń ǵylymı qyzmetkeri Urqııa Rysjanova, taǵy basqalar sóz alyp, halqymyzdyń Qostanaı óńirinen shyqqan rýhanı tulǵalarynyń kitaphanalarda nasıhattalýyna, ózge de mańyzdy máselelerge toqtaldy. Konferensııa sońynda N.Dáýletova atyndaǵy «Jyl kitaphanashysy» baıqaýynyń jeńimpazdary marapattaldy. Konferensııaǵa qatysýshylar kitaptar kórmesin de tamashalady.
Dáýletova oqýlary aldaǵy jyldary da jalǵasyn tabatyn bolady. Kelesi jyly estafetany Soltústik Qazaqstan oblysy alady.
Názıra Járimbetova.
Derek, foto: egemen.kz.
