Ispanııada zıka bezgegin juqtyrǵandar sany 80 adamnan asty

ASTANA. 11 sáýir. Ispanııada 88 adamnyń zıka bezgegine shaldyqqany belgili boldy. Bul týraly RIA «Novostı» aqparat agenttigine silteme jasaǵan egemen.kz tilshisi habarlady. Ispanııanyń densaýlyq saqtaý mınıstrliginiń málimdeýinshe, ótken aptadan beri atalǵan indetke shaldyqqandardyń sany 24 adamǵa artqan. Onyń ishindegi 11 adam júkti áıelder. Degenmen olardyń densaýlyǵyna eshqandaı qaýiptiń tónip turmaǵany anyqtaldy. Málimetter boıynsha, olardyń bári zıka bezgegi taralǵan aımaqtarǵa qydyryp barǵandar bolyp shyqty. Mınıstrlik indettiń Barselona, Madrıd, Kastılııa jáne Leon, Aragon, Valensııa, Galısııa, Andalýsııa, Navarra, Astýrııa, Mýrsııa, Kanar araldary, La-Rıoha jáne Bask elderiniń turǵyndarynda taralǵanyn habarlady. Osy jyldyń 1 sáýirine sáıkes zıka bezgegi 47 memleketke taraǵan. Al Amerıka aımaǵynda 190 myń adam osy dertke shaldyqqan. Aıta keteıik, zıka maımyldardyń juqpaly aýrýy bolyp esepteledi. Adamdar arasyna masalar arqyly taraıdy. Ol ásirese, júkti áıelder úshin asa qaýipti. Saldarynan ishtegi sábıdiń bas súıegi men mı qurylysynyń óz mólsherinde jetilmeýine, kórý, estý múshelerinde aýytqýshylardyń paıda bolýyna alyp keledi. Aıan Ábdýálı. Derek, foto: RIA «Novostı».