Elbasy Irannyń holdıng jáne kompanııa basshylarymen kezdesti

ASTANA. 12 sáýir. Qazaqstan Prezıdenti Nursultan Nazarbaev Iranda holdıng jáne kompanııa basshylarymen kezdesti. Bul týraly akorda.kz-ke silteme jasaǵan egemen.kz tilshisi habarlady. Kezdesýge túrli salalarda, sonyń ishinde energetıka, aýyl sharýashylyǵy, qurylys, taý-ken óndirý salalarynda jumys isteıtin Imidro, Ghadir Investments Group, Sunir Group, IRISL, Jahad-eSabz sııaqty 20-dan astam Iran kompanııalarynyń basshylary qatysty. Kompanııa basshylary Qazaqstanmen arada birqatar ıgerilgen jáne jańa baǵyttar boıynsha yntymaqtastyqtyń áleýeti zor ekenin atap ótti. Soǵan oraı olar júzege asyrylyp jatqan birlesken jobalar týraly aıta kelip, baılanystardy jolǵa qoıý máselesine zor qyzyǵýshylyq tanytty. Qazaqstan Prezıdenti de birqatar baǵyttar boıynsha yntymaqtastyqty jandandyrýǵa múddelilik bar ekenin bildirdi. Bul oraıda Nursultan Nazarbaev Iran kompanııalaryn «Qazaqstan-Túrikmenstan-Iran» temirjolynyń áleýetin belsene paıdalanýǵa shaqyrdy. Memleket basshysy bizdiń elmen ózara is-qımyldyń artyqshylyqtary týraly egjeı-tegjeıli baıandady. Qazaqstannyń Eýrazııalyq ekonomıkalyq odaqqa múshe bolyp tabylýy Iran kompanııalaryna odaqtyń ózge elderimen kedendik baj salyǵynsyz saýda jasaýyna múmkindik beredi. Buǵan qosa, bizdiń el taıaýda Dúnıejúzilik saýda uıymyna qosyldy, eýropalyq odaqpen keńeıtilgen seriktestik týraly kelisimge qol qoıdy, sondaı-aq, óńirde ınvestısııalyq ahýal eń úzdik kórsetkishterge ıe bolyp otyr. Nursultan Nazarbaev elimiz ınvestorlar úshin ınvestısııalyq sýbsıdııalardy, zańnama turaqtylyǵyn, salyq jeńildikterin qarastyratyn aýqymdy artyqshylyqtar toptamasyn usyna alatynyn aıtty. Buǵan qosymsha, «100 naqty qadam» ult jospary aıasynda ınvestısııalyq ahýaldy jaqsartý jóninde birqatar reforma júzege asyrylýda. Sondaı-aq, elde aýqymdy jekeshelendirý júrgizilýde. Halyqaralyq qarjy ortalyǵy jumysyn bastaıdy. Qazaqstan Prezıdenti kelesi jyly elimizde «Bolashaqtyń energııasy» taqyrybymen «EKSPO-2017» halyqaralyq mamandandyrylǵan kórmesi ótetinin eske saldy jáne soǵan baılanysty balama energetıka salasyndaǵy ozyq tehnologııalarǵa qyzyǵýshylyq bar ekenin aıtty. Memleket basshysy qazirgi kezde Qazaqstanda basymdylyǵy bar birqatar memlekettik baǵdarlamalar júzege asyrylyp jatqanyn, olarǵa Iran kompanııalary qatysa alatynyn atap ótti. Bular – ınfraqurylymdy damytýǵa arnalǵan «Nurly jol» baǵdarlamasy, ındýstrııalandyrý baǵdarlamasynyń ekinshi kezeńi jáne aýyl sharýashylyǵyn damytý baǵdarlamasy. Sonymen qatar, Qazaqstan Iranmen medısına, bıotehnologııa, agrotehnologııa, ǵarysh tehnologııasy sııaqty salalarda yntymaqtastyqty damytýǵa múddeli. Sondaı-aq ózara is-qımyl qazirgi kezde elimizde damytylyp jatqan ınnovasııalyq klasterler negizinde júzege asyrylýy múmkin. Sońynda Nursultan Nazarbaev Iran kompanııalarynyń syndarly yntymaqtastyqqa degen nıetin Qazaqstan joǵary baǵalaıtynyna nazar aýdaryp, olarǵa jumystarynyń jemisti bolýyna tilektestigin bildirdi. Talǵat Raıymbek. Derek, foto: egemen.kz.