Arhıvtaný olımpıadasy

Qazaqstan Respýblıkasy Prezıdenti arhıvinde Táýelsizdiktiń 25 jyldyǵyna oraı stýdentter arasynda alǵash ret arhıvtaný mamandyǵy boıynsha olımpıada ótti. «Ult Jospary – bes ınstıtýttyq reformany júzege asyrý jónindegi 100 naqty qadam» baǵdarlamasyn iske asyrý sheńberinde stýdentterdiń shyǵarmashylyq belsendiligin arttyrý jáne olarǵa bolashaqta arhıv mamandyǵy boıynsha jumys jasaýǵa yqpal etý maqsatynda daıyndalǵan is-shara ál-Farabı atyndaǵy Qazaq ulttyq ýnıversıtetimen birlese ótkizildi. «Indýstrııalandyrý já­ne ekono­mıkalyq ósim» ınstıtýttyq reformasyn iske asyrýdyń ma­ńyz­dy bir bóligi – daıarlanatyn kadr­lardyń básekelestik qabiletin arttyrý bolyp tabylady. Bul 79-qadamda kórsetilgen. Búginde osy maq­satta Prezıdent arhı­vin­de aýqymdy jumystar júr­gizi­lýde. Máselen, arhıvte turaqty túr­de birqatar joǵary oqý oryn­da­rynyń tarıh fakýltetiniń stý­dentterine óndiristik tájirıbe uıymdastyrylady, oqý zalynda stýdentter dıplomdyq jáne kýrstyq jumystaryn jazý úshin arhıv qujattary boıyn­sha zertteýler júrgizedi, arhıvtiń ártúrli is-sharalaryna qatysady, sonyń ishinde tarıhı-qujattyq kórmeler, dóńgelek ústelder, belgili zertteýshi tarıhshylarmen kezdesýler ótip turady. Sondyqtan da, atalmysh olımpıada – stýdentterdiń ǵylymǵa yntasyn arttyryp, Ulttyq arhıv qorynyń qujattaryn áıgileýge, arhıv isi men qujattanýdy nasıhattaýǵa, arhıv mamandyǵynyń mártebesin kóterýge óz úlesin qospaq. Olımpıada eki týr boıynsha ótti. Birinshisi 10 suraqtan turatyn test tapsyrmalary. Ekinshi týr – úı tapsyrmasy. Stýdentter aldyn ala berilgen taqyryptar boıynsha baıandama jasady. Qazylar alqasynyń músheleri Prezıdent arhıviniń basshylyǵy jáne ál-Farabı atyndaǵy QazUÝ-diń oqytýshylary boldy. Olımpıadaǵa ál-Farabı atyn­daǵy Qazaq ulttyq ýnıversıteti, tarıh fakýltetiniń «Muraǵattaný, qu­jattardy júrgizý jáne qujattamamen qamtamasyz etý» mamandyǵynan irik­telip 15 stýdent qatysty. 3 stýdent júldeli oryndarǵa ıe boldy. 1-shi oryndy 2 kýrs magıstranty Gúljan Qalmyrzaeva jeńip alsa, 2-shi oryndy 3 kýrs stýdenti Balǵyn Jaqsylyq, 3-shi oryndy 3 kýrs stýdenti Jangeldi Sultanhan ıelendi. Qalǵan stýdentter ártúrli nomınasııalarmen marapattaldy. Júldeli úsh orynǵa belgili tarıhshy, memleket jáne qoǵam qaıratkeri Marat Jaqsybaıuly Hasanaevtiń atynan aqshalaı shákirtaqy taǵaıyndaldy. Gúlzeınep SÁDIRQYZY, «Egemen Qazaqstan».