Ǵarysh álemine saıahat

Ǵarysh salasyn meńgerip 3 birdeı qazaq ǵaryshkeriniń zeńgir kókke kóterilýi táýelsiz Qazaqstannyń 25 jyl ishindegi úlken jetistikteriniń biri. Álbette, ǵaryshker bolýdy armandamaıtyn bala joq shyǵar? Al, ol úshin bilimdi, zerek, kúsh-qaıraty mol azamat bolyp ósýleri qajet. Taıaýda El Táýelsizdiginiń 25 jyldyǵy jáne Halyqaralyq ǵaryshkerler kúnine oraı «Atameken» Qazaqstan kartasy» etno-memorıaldyq kesheninde ótken «Táýelsizdiktiń tań nuryna bólengen qanatty qazaqtar» atty mádenı is-sharada baqytty balǵyndar óz ónerlerimen bólisti. Bul mańyzdy sharany atalmysh keshen qyzmetkerleri men Astana qalalyq Raıymbek batyr atyndaǵy №50 «Qazǵarysh» mektep-lıseıi birlesip uıymdastyrǵanyn aıtý lázim. Merekelik sharanyń shymyl­dyǵyn ashyp, quttyqtaý sóz sóı­legen «Atameken» Qazaqstan kartasy» etno-memorıaldyq keshe­niniń dırektory Alma Altybaeva kishkentaı órenderge qarap: «Ǵa­ryshqa kez kelgen adamdy ushyra bermeıdi. Sol úshin sabaqty jaqsy oqyp, tártipti bala bolyńdar. Toqtar, Talǵat, Aıdyn aǵalaryń sııaq­ty, Qazaqstannyń betke us­tar batyr, qaharman azamattary bolý­laryńa tilektespiz», – dedi aǵynan jarylyp. Sonymen qosa, jas órkender al­­dynda fızıka-matematıka ǵylymdarynyń kandıdaty, L.N.Gý­mılev atyndaǵy Eýrazııa ult­tyq ýnı­versıteti «Ǵaryshtyq tehnıka jáne tehnologııalar» kafedrasynyń dosenti Ábdiqul Ashýrov, «Astana mádenıeti», «IKOM Qazaqstan» jýrnaldarynyń bas redaktory Qýandyq Shamahaıuly, Raıymbek batyr atyndaǵy №50 «Qazǵarysh» mektep-lıseıi dırektorynyń tár­bıe isi jónindegi orynbasary Nu­rash Iskakova jáne basqalar ǵa­rysh­qa qatysty ǵıbratty áńgimeler aıtty. Sondaı-aq, taqyryp sheńberinde «Ne sebepti ǵarysh aılaǵy Baıqo­ńyrǵa salynǵan?», «Ǵarysh alańyn salý úshin qandaı sharttardy negizge alý kerek?», «Ǵarysh qandaı álem?» degen syndy qyzyqty saýal­­dar bala qııalyndaǵy shabytty keńistik álemine ushtap, sharyqtatyp jibergendeı boldy. Sharada Baıqońyr ǵarysh aılaǵy men qazaq ǵaryshkerleri týraly beınetaspalar kórsetilip, slaıdtar qorǵaldy. Ǵaryshkerler kúnine oraı kórme de uıymdastyrylǵan eken. О́nerli órender osy taqy­rypqa saı óz shyǵarmalaryn usy­nyp, patrıottyq taqyrypta ánder shyrqady. Jıyn sońynda osy is-sharaǵa bel­sene atsalysqan oqýshylar arnaıy Alǵys hattarmen marapattaldy. Raýshan TÁÝIRHANQYZY, «Egemen Qazaqstan». Sýretti túsirgen Orynbaı BALMURAT.

Qazaqtyń ǵaryshkerleri

Áni: Q.Maqanovtiki Sózi: E.Tilepberdiniki   Qazaqtyń batyr uldary, Arqalap Eldiń senimin, Ǵaryshqa tylsym zyrlady, Báıgege tigip ómirin.   Qaıyrmasy: Táýelsiz elden, Kók týly tórden, Betke alyp juldyz, aı, kúnin, Elbasy, el bop, Batasy kól bop, Asyrǵan eldiń aıbynyn! Qýat ap jerden, Tylsymdy jeńgen, Toqtar men Talǵat, Aıdynym!   Máńgilik eldiń tiregi, Senderge tartsyn ulandar. Alashtyń altyn júregin, Qorǵasyn qaısar qyrandar!   Baıqońyr baıtaq dalamyz, Ushyrǵan aıǵa er sender. Torǵaıdan qushaq jaıamyz, Ǵaryshty sharlap kelseńder.