Saıasattanýdyń jas sańlaqtary

mektep oqýshylarynyń I respýblıkalyq «Á.Bókeıhan» olımpıadasynda anyqtaldy Jaqynda L.N.Gýmılev atyndaǵy Eýrazııa ulttyq ýnıver­sıtetinde saıasattaný kafedrasynyń uıymdas­tyrýymen qazaqtyń birtýar saıası qaıratkeri, ult kósemi Álıhan Bókeıhanovtyń 150 jyldyǵyna arnalǵan mektep oqýshylarynyń Saıasattanýdan birinshi res­pýblıkalyq «Álıhan Bókeıhan» olımpıadasy bolyp ótti. Álıhan Bókeıhanov táýelsiz Qazaq memleketin qurý týraly ıdeıalardyń basynda turǵan, eń alǵashqy iz salýshy bolǵan, HH ǵasyrdyń basyndaǵy búkil túrki dúnıesindegi, jalpy, sol ǵasyrdyń basyndaǵy saıası-azattyq qozǵa­lys­taǵy planetarlyq oılaý júıe­si bar, álemdik órkenıet deń­geıindegi saıasatker, oıshyl, qa­jyr­ly, tabandy, osy jolǵa búkil ómirin arnaǵan, sol jolda ómirin qurban etken kúresker. Qazaq halqyna alǵashqy bolyp Alash ıdeıa­syn, derbes memleket qurý, onyń memlekettik-saıası qurylysynyń teorııalyq negizin qalap, qazaq saıasattaný ili­miniń alǵashqy iz salýshysy bol­ǵan ǵalym, saıasattanýshy, oıshyl, memleket qaıratkeri. Alash ult-azattyq qozǵalysynyń negizin qalaýshy, ıdeology, saıası kósemi, Qazaqtyń avtonomııalyq Alash memleketin qurýshy, onyń basshysy ári premer-mınıstri. Olaı bolsa, Táýelsizdigimizdiń 25 jyldyǵy qarsańynda mektep oqýshylarynyń Á.Bókeıhanov bastaǵan qazaq zııalylary men saıa­sı oıshyldarynyń ilimi men isin oqyp, tanyp, ol boıynsha olım­pıadaǵa qatysýǵa talap jasaýy – búgingi jas urpaqtyń dúnıe tanymy men murat-maqsattarynyń keńdigin, otanshyldyǵyn, týǵan eliniń, onyń birtýar uldarynyń ómiri men isin bilýge talaptarynyń jarqyn kórinisi ekendigi anyq. Jastyqtyń oty jalyndap, Ár júrekte janǵan shaq, Talaptyń aty aryndap, Ár qıynǵa salǵan shaq, – dep Abaı kemeńger aıtqandaı, zor talappen olımpıadaǵa kelgen oqý­shylar sany – 133. Birinshi olım­pıadaǵa qatysýshylar qam­tyǵan jaǵrapııa da birshama keń. Qyzylorda, Pavlodar, Aqtó­be, Aqmola, Atyraý, Ońtústik Qa­zaq­stan oblystarynan jalpy jıyny 39 talapker keldi. As­tana qalasy mektepterinen 136 oqý­shynyń qatysýy, sóz joq, báse­ke barysynyń qyzyqty, tar­tysty bolýyna áser etetin shyǵar­mashylyq ahýaldy ár qyrly, ári san-salaly bıikke kóteretin, qýan­tarlyq jaǵdaı boldy. Sóıtip, Qazaqstannyń túkpir-túkpirinen óz attaryn, óz bilimderin, mektep attaryn, ustaz esimderin respýblıkaǵa pash eter tamasha, talantty jastar jınaldy. Qazaqstan Respýblıkasy Pre­zı­denti janyndaǵy Qazaqstan Strategııalyq zertteýler ınstıtýty, Qazaqstannyń «Aq jol» demo­kratııalyq partııasy, «Egemen Qazaqstan» gazeti, Qazaqstan Res­pýblıkasynyń Ulttyq mýzeıi já­ne Ulttyq akademııalyq kitap­hana, Astana qalalyq bilim bas­qarmasy, «Baq Orda» kompanııa­sy jáne basqalar olımpıada demeýshileri bolǵanyn aıtý paryz. Qyzylordalyq Erkebulan Qadirbaı men astanalyq Jansaıa Bolatbekova olımpıadanyń je­ńis tuǵyryna kóterildi. Taǵy bir astanalyq Malıka Dos­ma­ǵambetova, pavlodarlyq Mar­ǵulan Janbaý, astanalyqtar Rabı­ǵa Ramazan men Mıras Bı­sem­baıuly ekinshi oryndy ıe­lendi. Qyzylordalyq Azamat Ora­zalıev, astanalyq Nıkıta Kanı­shev, qyzylordalyqtar Aı­bota Baqytǵanı men Baqtııar О́teýli jáne pavlodarlyq Aqbota Jan­sultanova, sondaı-aq, astanalyq Dana Aýǵanova úshinshi júldeni enshilep, saıasattanýdyń jas sańlaqtary atandy. Olımpıadaǵa qatysý­shy­larǵa estelikke kitaptar men ká­desyılar tartý etildi. Sonymen birge, bel­gili ánshiler Baǵdat Sáme­dınova, Klara Tólen­baıqyzy, Aıbek Bek­bosyn oqýshy órender saıysyna qoldaý kórsetip, ásem ánderin syılady. Nazar QASYM