Álem-jálem álem
Amerıkalyq 46 jastaǵy ánshi Meraıı Kerı jaqynda ózin 70 mln. dollarǵa saqtandyrdy. Sonyń ishinde ol aıaǵynyń qunyn munyń teń jartysyna baǵalaǵan.
Buǵan ánshiniń qazir dańqy dúrildep turǵany aıryqsha áser etse kerek. Osy tusta ol biraz artyq salmaǵyn joǵaltyp, aldaǵy tamyz aıynda bolatyn úılený toıyna qyzý daıyndalyp jatqan kórinedi.
Pysyq jigit páterine syra aǵatyn qubyr kirgizgen
Reseıdiń Chelıabi qalasynyń turǵyny óziniń páterine syra aǵatyn qubyr tartyp alypty. As úıdegi krannyń birinen sý aqsa, ekinshisinen salqyndatylǵan kóbikti sýsyn lekildeı jóneledi.
Joǵary bilimdi mehanık Andreı Ermakov osylaı óz armanyn júzege asyrypty. Ol turbany páteriniń astyndaǵy magazınnen tartypty. Basynda ıdeıaǵa tańǵalǵan saýda júıesiniń basshylyǵy jobany qaıta jasap, ony turǵyn úı ınspeksııasynda tirketip alǵan. Qazir aıtylǵan páterge myna «ǵajaıypty» kórmekshi bolyp keletinder kóp kórinedi.
Fýtbolshynyń shashyn alý úshin match toqtatyldy
Saýd Arabııasynda «ál-Shabab» jáne «ál-Kadısııa» fýtbol komandalary arasynda ótip jatqan chempıonat matchy kezinde qaqpashy Valıd Abdýllanyń shashyn týra alań ústinde alýǵa týra kelgen.
Bul shara kezdesý tóreshisiniń uıǵarymy boıynsha jasalǵan. Ol alań ıeleri golkıperiniń shashy tym ósip ketkenin baıqaǵan soń, osyndaı qadamǵa barǵan. Al ıslamda er adamnyń shashty shamadan tys ósirip jiberýi dinniń ádebin qorlaǵandyq bolyp tabylady.
Jalańash konkýrsqa qatysqan muǵalim qyzmetinen ketti
Meksıkanyń bastaýysh synyptarǵa sabaq beretin 24 jasar muǵalimi jaǵajaıda jartylaı jalańash tverk kórsetkeni úshin qyzmetimen qoshtasýǵa májbúr boldy.
Klarıssa esimdi boıjetken óz jumys ornynan 400 mıl qashyqtyqta ornalasqan jerge demalýǵa barǵanynda jaǵajaıda qan qyzdyratyn mýzykanyń áýenimen ótken jartylaı jalańash tverk konkýrsyna bıkını «kástómimen» qalaı qosylyp ketkenin ózi de baıqamaı qalǵan. Symbatty sulý sol saıysta bas báıgeni ıemdenip, 260 dollar aqsha alǵan. Biraq Kabo-San-Lýkas kýrortyn dúrildetken bul jeńis oǵan óte qymbatqa túsken. Sol sátter túsirilgen vıdeo jeliden kóringen boıda ózi de qyzmetten qýylyp ketken.
12 jasar bala eki kún Avstralııa premeri boldy
«Vıkıpedııanyń» qaıta óńdelgen betteri arqasynda 12 jasar bala Avstralııanyń 30-shy premeri bolyp shyǵa keldi.
Muny Orlı Fenelon esimdi balaqaıdyń ózi jasapty. Ol saıtta jóndeý jumystarynyń júrip jatqanyn paıdalanyp, óz atyn Avstralııa premer-mınıstrleri onlaın-ensıklopedııasy tizimine kirgizip jibergen. Osylaısha, Fenelon osynshalyqty joǵary oryntaqta otyrǵan eń jas laýazym ıesi atanyp shyǵa kelgen.
Aqparat agenttikteri materıaldary negizinde daıyndaldy
