Jasóspirimder qylmysy alańdatady

Jambyl oblysy ákimdiginde El­­basy N. Nazarbaevtyń «Qazaq­stan Respýblıkasynda quqyq qor­ǵaý qyz­meti men sot júıesiniń tıimdiligin arttyrý jónindegi sharalar tý­raly» Jarlyǵyn jas­ós­pi­rim­der qyl­mysynyń aldyn alý já­ne oǵan qarsy kúres júrgizý aıa­syn­da júze­ge asyrý maqsa­tyndaǵy quqyq qor­ǵaý jáne memlekettik or­gandardyń vedomstvo­aralyq keńesi ótti. Onda talqylanǵan másele boı­ynsha Bas Prokýror Q. Mámı, ob­lys ákimi Q. Bozymbaev, oblys pro­kýrory B. Taıymbetov, oblys­tyq IID basqarmasy bastyǵynyń orynbasary M. Qojaev jáne bas­qalar sóılep, oblys aýmaǵy men onyń ortalyǵynda jasóspirimder qylmysynyń óse túsýi alań­datyp otyrǵanyna toqtaldy. Oblysta jasóspirimder qyl­my­synyń jaǵdaıy týraly laýa­zymdy tulǵalardyń qatysýymen budan buryn da birneshe ret keńes ótip, atqarylatyn mindetter belgilengen. Biraq soǵan qa­ramastan, jasóspirimder ara­syn­daǵy qyl­mys­ty jaǵdaı kúr­deli kúıinde qalýda. Burnaǵy jyldan beri ob­lysta asa aýyr qylmys jasaǵan, onyń ishinde kisi ól­tirgen jas­óspirimderdiń sa­ny eki ese ósken. Ásirese, bul másele oblys orta­lyǵynda ózekti máse­lege aınal­ǵan. Mysaly, kámelet­ke tolma­ǵandar úlesindegi qyl­mystardyń jartysynan asta­my Taraz qala­synda jasalǵan. Qyl­mysty top­tardyń mektep oqý­shylaryn bopsalaý arqyly aq­sha jınaý áreketi áli tyıylmaǵan. Keńesti qorytyndylaǵan Bas Prokýror jasóspirimder qylmy­syna qarsy is-qımyl jáne onyń aldyn alý salasyndaǵy jumys­tyń kemshilikterin joıý jáne osy saladaǵy sharalardy uıymdas­ty­rý jóninde jańa mindetter qoıdy. Kósemáli SÁTTIBAIULY. Jambyl oblysy.