Tıimdi seriktestik kelisim

Qazir sybaılas jemqorlyqqa qarsy is-qımyl amaldary kúnnen-kúnge jandanyp keledi. Sonyń biri retinde keshe «Astana EKSPO-2017» ulttyq kompanııasy men Sybaılas jemqorlyqqa qarsy is-qımyl ulttyq bıýrosy arasynda seriktestik kelisimine qol qoıyldy. Osyǵan oraı endi «Astana EKSPO-2017» UK» AQ qyz­metiniń ashyqtyǵyn qamtamasyz etý, sondaı-aq, sybaılas jemqorlyq mádenıetin qalyptastyrý boıynsha ári jemqorlyqty joıýǵa yqpal etý men áleýmettik jaýapker­shilikti arttyrý úshin eki jaq tyǵyz qarym-qatynasta jumys isteıtin bolady. Bul jónindegi qujatqa Ulttyq kompa­nııa basqarma tóraǵasy Ahmetjan Esimov pen Sybaılas jemqorlyqqa qarsy is-qı­myl ulttyq bıýrosynyń tóraǵasy Qaırat Qojamjarov qol qoıdy. «Biz úshin jemqorlyqtyń qandaı da bir belgileri týrasynda ózara aqparat almasý máselesi mańyzdy. Sonymen qatar, birlesken jumy­symyz qoǵam qyzmetkerleri tarapynan jemqorlyq quqyq buzýshylyqtyń aldyn-alýǵa, sondaı-aq josyqsyz kompanııalarmen kelisimsharttar jasasýǵa jol bermeý­ge baǵyttalǵan. Munyń barlyǵy Ulttyq bıýro men ulttyq kompanııanyń kózdegen maqsattaryna sáıkes keledi», – dedi Qaırat Qojamjarov. Osy rette, Qaırat Qojamjarov kelisimge qol qoıý bastamasy úshin Ahmetjan Esimovke rızashylyǵyn bildirdi. Al Ahmetjan Esimov, EKSPO – Elbasy bastamasymen qolǵa alynǵan táýelsiz Qazaqstan tarıhyndaǵy eń aýqymdy ári orasan joba deı kele: – «Búgin biz osynda jobaǵa qatysýshy barlyq kompanııalar­dy, bas merdigerlerimizdi shaqyrdyq. Bul bireýlerdi qorqytý úshin emes, quqyq buzýshylyqqa jol bermeý úshin jasalyp otyr. Bizdiń sybaılas jemqorlyqqa qarsy ókildik jumysy naǵyz osy quqyq buzýshylyqtyń aldyn alyp, oǵan jol bermeýge baǵyttalǵan. Eń bastysy, bıznes ne qalaıtynyn, memlekettiń ne qalaıtynyn túsinýimiz qajet. Álbette, bıznes barynsha kóp paıda tabýǵa, al memleket qazirgi jaǵdaıdy eskersek, shyǵyndardy azaıtýdy qalaıdy», – dep atap ótti. «Astana EKSPO-2017» ulttyq kompa­nııasynyń basshysy Ahmetjan Esimov qol qoıylǵan memorandýmnyń tek resmı sıpatta ǵana bolmaıtyndyǵyn da eske saldy. Qujat ashyqtyq pen jarııalylyq qaǵıdattary boıynsha jasalǵan birlesken ári kelisilgen is-qımyl negizinde seriktestiktiń tıimdiligine yqpal etetin bolady. Aleksandr TASBOLATOV, «Egemen Qazaqstan»