Ýaqyt qoıyp otyrǵan talap

Tuńǵysh Prezıdentimiz oqyǵan qabyrǵaly bilim ordasy Qaraǵandy memlekettik tehnıkalyq ýnıversıteti asa mańyzdy reformalardy júzege asyrý sharalarynyń qashanda aldyńǵy qatarynda júredi. Qoǵamda bolyp jatqan oń ózgeristerge sergek qarap, olardy ilgeriletý barysynda belsendi pozısııa ustaný – Akademık Arstan Máýlenuly Ǵazalıev basqaratyn oqý ornynyń bolmys-bitimin tanytatyn naqty nyshannyń biri bolsa kerek. Atalǵan ýnıversıtette 19 sáýirden bastap «Orta jáne joǵary mektepter júıesindegi kóptildi bilim berýdiń ádistemelik qyrlarynyń máseleleri» atty halyqaralyq ǵy­lymı-praktıkalyq semınar ótip jatyr. Bul mańyzdy sharaǵa elimizdiń túkpir-túkpirinen 100-ge tarta mektep muǵalimderi men kolledj jáne joǵary oqý oryndarynyń oqytýshylary kelip, pánderdi birden úsh tilde oqytý jónindegi tájirıbelerimen bólisýde. Mamandardyń pikirinshe, kóptildi bilim berý úderisin mektepten bastaý kerek. Sol sebepti, semınarǵa qatysýshy ustazdar búgin Qaraǵandydaǵy N.Nur­maqov atyndaǵy №2 mektep-ınternatta bolyp, úsh tilde oqytý jónindegi synaqtyń barysymen tanysady. Búgingi kúnde bul sharýadaǵy bas­ty máseleniń biri – kóptildik bilim berýdi praktıka júzinde endirý bolyp otyr. Bilim salasyndaǵy jańashyl reformaǵa baılanysty ata-analar tarapynan da kóptegen suraqtardyń týyndaıtyny zańdy. Biraq ta, ómirsheń ózgeristerge úrke qaraýdyń qajeti joq, dep esepteıdi lıngvıst ǵalymdar. «Jalpy qoryqpaý kerek. Árıne, keı-keıde kóńilge kúdik uıalaýy da múmkin, degenmen tilderdi damytý jal­py­laı alǵanda jeke tulǵanyń jan-jaqty damýyna yqpal etedi», – deıdi semınardy uıymdastyrýshylardyń biri, QarMTÝ-dyń shet tilderi seksııasynyń meńgerýshisi Aıla Jumabekova. Halyqaralyq semınar jumysyna Qazaqstan Respýblıkasy aǵylshyn tilin oqytý qaýymdastyǵynyń pre­zı­denti T.Letıaıkına, Úsh tilde bilim berý ortalyǵynyń dırektory L.Syrymbetova, Brıtan keńesi áriptestik qarym-qatynasty damytý jónindegi menedjer A.Bekturova, Qaraǵandy qalalyq aǵylshyn tili oqy­týshylary qaýymdastyǵynyń tór­aıymy F. Kakjanova qatysýda. Jalpy, bilim berý úderisinde mektepten ýnıversıtetke deıingi barlyq deńgeıde kóptildi oqytý júıesin engizý birneshe tildi meńgergen, ózin-ózi damytý men jetildirýge umtylǵan, básekege qabiletti jáne kópmádenıetti, kez kelgen jaǵdaıda kommýnıkatıvti qyzmetti úsh tilde iske asyra alýǵa qabiletti tul­­­ǵany qalyptastyrýdyń kepili. Sol sebepti, semınar aıasynda praktıkalyq máselelerge erekshe nazar aýdaryldy. Osy maqsatta problemalyq semınarlar, sheberlik saǵattary, dóńgelek ústelder uıymdastyryldy. Semınardyń qa­tysýshylary kásibı maqsattaǵy áleý­mettik pánderdi kóp tilde oqytý salasyndaǵy úzdik praktıkterdiń materıaldarymen tanysýǵa mol múmkindik aldy. «Qazirgi kezde aǵylshyn tilin oqy­týdyń ártúrli deńgeılerine sáıkes oqy­týdyń jańa tehnologııalaryn, aqparattyq jáne kompıýterlik júıeler arqyly izdenis jumystaryn jandandyra túsýdiń barlyq múmkindikterin týdyrý qajet», dep sanaıdy ustazdar qaýymy. Shetel tilin oqytýda lınga­fondyq qural-jabdyqtar men aýdıo, vıdeo keshenin paıdalana otyryp, oqýshylardyń aýyzsha jáne jazbasha aýdarýdaǵy bilimin jetildirip, sózdik qoryn qosymsha jańa sózdermen baıytyp, olardyń oı-órisin damytý semınarǵa qatysqan mamandardyń pikirinshe, kezek kúttirmeıtin mindet­terdiń biri. Erteń, ıaǵnı 22 sáýirde halyqaralyq ǵylymı-praktıkalyq semınardyń sońǵy kúninde Kanadadan jáne Nazar­baev Ýnıversıtetten  ǵalymdar kelip, ustazdar aldynda dáris oqıdy dep josparlanǵan. Al ıgi sharanyń jabylýynda semınarǵa qatysqan muǵalimder men ustazdarǵa biliktilikterin jetil­dirgenderi jóninde sertıfıkattar men kýálikter saltanatty jaǵdaıda tabys etilmek. Qaırat ÁBILDINOV, «Egemen Qazaqstan» QARAǴANDY