Kisi óltirýge tapsyrys bergen kúdikti ustaldy

QARAǴANDY. 21 sáýir. Qaraǵandyda óziniń tanysyn óltirýge tapsyrys bergen qala turǵyny qolǵa tústi. Bul týraly oblystyq ishki ister departamentiniń baspasóz qyzmetine silteme jasaǵan egemen.kz tilshisi habarlady. On toǵyz jastaǵy turǵynnyń óziniń tanysyn óltirýge kisi jaldaǵysy kelip júrgeni týraly aqparat Qaraǵandy oblystyq ishki ister departamentiniń uıymdasqan qylmysqa qarsy kúres basqarmasyna kelip túsken. Jedel-izdestirý sharalary barysynda kúdiktimen aradaǵy áńgimeni taspaǵa jazyp alýdyń sáti tústi. Onda kúdikti jaldamaly kisi óltirýshiniń qyzmetin 250 myń teńgege baǵalaǵan. Sondaı-aq, ol aıǵaq retinde «marqumnyń» ólip jatqan sýreti túsirilgen uıaly telefonyn alyp kelý týraly talap qoıǵan. Kúdikti Qaraǵandydaǵy saýda úıleriniń birinde kıllerdiń rólin oınaǵan polısııa qyzmetkeri bergen telefondy alyp jatqan jerinde tutqyndaldy. Qazirgi ýaqytta ol ýaqytsha ustaý oqshaýlaǵyshynda qamaýda otyr. Sotqa deıingi tergeý amaldary júrgizilýde. Qaırat Ábildınov. Derek, foto: Qaraǵandy oblystyq ishki ister departamentiniń baspasóz qyzmeti.