Joǵalǵan qyz tabyldy

«SOS!» dep aıqaılaǵyń keledi keıde. Adamdardyń qatygezdenip, júregi qatyp, kisilik kelbetin joǵaltyp jatqanyn kórgende kimnen kómek suraryńdy da bil­meısiń. Qarapaıym ǵana adam­gershilik dep atalatyn sezimniń ózi joǵalýdyń aldynda tur ǵoı. Meıirim deıtin úlken qasıetti árkimniń boıynan kezdestire bermeısiń búginde. Eger meıirim men mahabbat bolsa, onda jańa týǵan sábıin dárethanaǵa tastaı ma? Adamdar qaǵaz aqsha úshin birin-biri óltire me? Tutastaı otbasyn qoısha qyryp kete me? Qyzdyń aryn taptaı ma? Adamdar iz-túzsiz joǵalyp kete me? Osydan birneshe kún buryn áleýmettik jeli shýlap qoıa berdi. Shıeli aýdanynyń Bestam aýylynda turatyn 16 jastaǵy qyz joǵalyp ketken. Taǵy qandaı sumdyq boldy eken dep záremiz ketti. О́ıtkeni, jas qyzdardyń joǵalyp, denesi taýdyń ańǵarynda, joldyń boıyn­da tabylyp jatqan jaǵdaı joq emes. Sáýirdiń 18-i kúni sabaqqa ketip, sodan oralmaǵan oqýshyny aǵaıyn-týysqanynan bólek, quqyq qorǵaýshylar da sabylyp izdedi. 2-sabaqtan keıin eshkimge eshteńe aıtpaı ketip qalǵan. Jurt tabanynan tozdy. Ásirese, Shıeli aýdandyq ishki ister bólimi kúni-túni jumys istedi. Jas qyzdyń joǵalý fak­tisi boıynsha izdestirý sharalary júrgizilip, jasóspirimniń tur­pattyq beınesi, erekshe belgileri jasaldy. Úıden ketip qalýyna sebep bolarlyq bar­lyq jaıttar jan-jaqty qa­ralyp, barýy múmkin oryndar tekserilip, qurbylary men dos­tarynan túsiniktemeler alyndy. Atalǵan faktige sebep bolarlyq jaıttar, barlyq boljamdar jan-jaqty qaraldy. Osyndaı eńbektiń arqasynda qyz tabyldy. 21 sáýir kúni túski saǵat 14.30 shamasynda Qyzylorda qalasynan qýanyshty habar keldi. Jergilikti polısııa qyzmetiniń kámeletke tolmaǵandar isteri jónindegi aǵa ýchaskelik polısııa ınspektorlary Abaı Mádıev pen Maqsat Syzdyqov qyzdy Qyzylorda qalasy, áýejaı aýmaǵyndaǵy tanysynyń úıinen taýyp alǵan. Onyń jalpy jaǵdaıy jaqsy dep baǵalanyp otyr. Al úıinen ne úshin ketip qalǵany, nege ata-anasyna amandyǵyn aıtyp eskertpegeni anyqtalyp jatyr. Erjan BAITILES, «Egemen Qazaqstan» Qyzylorda oblysy