Áleýmettik jelide «Ǵasyr laqtyrýy» qyzý talqylanyp jatyr

ASTANA. 23 sáýir. Olımpııa oıyndary jaqyndaǵan saıyn áleýmettik jelide ótken Olımpıadalardan syr shertetin qyzyqty dúnıeler jarııalanyp jatyr. Bul týraly egemen.kz tilshisi habarlady. Solardyń biri 1972 jyly Mıýnhen qalasynda ótken Jazǵy Oıyndarda «Ǵasyr laqtyrýy» atanǵan kúres tásiline arnalǵan. Qazir bul postty facebook áleýmettik jelisinde 712 adam óz paraqshalarynda taratsa, oǵan 1 400-den astam adam laık basqan, ıaǵnı postty unatamyn degen baǵasyn bergen. Postta salmaǵy 110 kılo Germanııa balýany Vılfrıd Dıtrıhtiń grek-rım kúresinen ótken synda ózinen salmaǵy aýyr amerıkalyq túıe balýan Krıs Teılordyń belinen qysyp, asyra laqtyrǵany týraly jazylǵan. Osy postta salmaǵy 187 kılo AQSh balýanynyń qulap bara jatqan sýreti jarııalanǵan. Bul sýretti shved fotograftary túsirgen. Ol sýret «Ǵasyr laqtyrýy» dep atalyp ketti. Keıin amerıkalyq balýan: «Bul ómirde meni kilemnen julyp alyp, laqtyratyn adam bar dep eshqashan oılaǵan joqpyn. Men qatelesken ekenmin», degen eken. Osy Olımpıadada Krıs Teılor grek-rım jáne erkin kúresten beldesti. Ol Vılfrıd Dıtrıhten jeńilgennen keıin jartylaı fınalda erkin kúresten Keńes Odaǵynyń ataqty balýany Aleksandr Medvedten utylyp, qola júldeni ıelendi. Sol kezde Krıs Teılordyń jasy 22-de bolsa, talaı Olımpıadanyń kileminiń shańyn qaqqan Vılfrıd Dıtrıhtiń jasy 39-da bolypty. Buǵan deıin Germanııa balýany 1960 jyly erkin kúresten Rım Olımpıadasynyń chempıony atansa, osy jarysta grek-rım kúresinen kúmis medaldi, 1956 jyly Melbýrnde ótken Olımpıadanyń kúmis júldesin,1964 jyly Tokıo jáne 1968 jyly Mehıko Olımpıadasynyń qola júldesin jeńip alǵan bolatyn. Ol 1992 jyly 58 jasynda Ońtústik Afrıka Respýblıkasynda qaıtys boldy. Al Krıs Teılor 1979 jyly AQSh-ta 29 jasynda  baqılyq saparǵa attandy. Dastan Kenjalın. Derek, foto: Facebook áleýmettik jelisi.