«Bóbektegi» Naýryz toıy

Keshe Almatyda «Bóbek» Ulttyq ǵylymı-praktıkalyq bilim berý jáne saýyqtyrý ortalyǵynyń «Shattyq» alańynda «Bóbek» qaıyrymdylyq qorynyń Prezıdenti Sara Nazarbaevanyń qatysýymen Naýryz meıramyna arnalǵan merekelik shara ótti. Bilim jáne ǵylym mınıstri Erlan Saǵadıev, «Jandaný álemi» qorynyń quryltaıshysy Álııa Nazarbaeva, Parlament Májilisiniń depýtaty, Qazaqstan Respýblıkasyndaǵy Bala quqy jónindegi ýákiletti ókil Zaǵıpa Balıeva, sondaı-aq, Almaty qalasy ákimdigi, Tuńǵysh Prezıdent qory, bilim berý mekemeleri men qoǵamdyq uıymdary ókilderi, belgili mádenıet qaıratkerleri merekelik is-sharanyń qurmetti qonaqtary boldy. «Máńgilik El – máńgilik jalpy­adamzattyq qundylyqtar» atty negizgi ıdeıaǵa ıe bolǵan mere­kelik is-sharanyń barysynda kóktemgi meıramnyń jarqyn dástúrleri – tarıhı retrospektıvada kórsetilip, merekelik baǵdarlamany gala-konsert, ta­rıhı-mádenı kompozısııalar, teatrlandyrylǵan qoıylymdar kórkeıte tústi. – Qurmetti balalarym, kishkene dostarym meniń! – dedi merekelik saltanatty ashqan, ómiri máńgilik adamzattyq qundylyqtarmen órilgen, júrek jylýy men nuryn barlyq qazaqstandyq balalarǵa arnaǵan «Bóbek» qorynyń prezıdenti Sara Alpysqyzy. – Sizderdiń shaqyrtýlaryńyzdy úlken yqylaspen qabyldap, Naýryz merekesin birge toılaǵaly keldim. Astanadan da qurmetti qonaqtarymyz kelgen eken, barlyqtaryńyzdy izgilik pen jaqsylyqtyń meıramymen quttyqtaımyn! Ulystyń uly kúni qutty bolsyn, bárimizge qut-bereke ákelsin! Elimizge, hal­qymyzǵa tynyshtyq, ár otbasyna, ár balaǵa baqyt tileımin! Odan keıin bóbektikterdi Naýryz merekesimen elimizdiń Bas muǵalimi – Bilim jáne ǵylym mınıstri Erlan Saǵadıev quttyq­tap, Sara Alpysqyzynyń úlken Otanymyz – Qazaqstan úshin, onyń bolashaq ıeleri – balalarǵa jasap jatqan ıgi isterin atap ótti. «Bóbektiń» júrgizip otyrǵan osy baǵyttaǵy jumystary álemniń kez kelgen jáne bizdiń elimizdegi bilim berý júıesindegi negizgi dińgek bolyp sanalady. Jańadan bekitilgen tórt jyldyq Bilim jáne ǵylym damýy baǵdarlamasynda Sizderdiń oryndaryńyz erekshe. Sondyqtan, mınıstrlik atynan Sizge alǵys bildire kele, aldaǵy ýaqytta adamǵa bala kezden adamgershilik, izgilik qundylyqtaryn boıyna sińirip ósýdegi rýhanı-adamgershilik bilim berýge arnalǵan «О́zin ózi taný» avtorlyq jobańyzdyń iske asýyna «Bóbekpen» yntymaqtastyqta, bar kúsh-jigerimizben jumys isteıtinimizdi bildirgimiz keledi», dedi mınıstr. «Bóbektikter» gala-konsert bastalǵansha qonaqtarǵa «Ǵa­syrlar qoınaýynan» atty birinshi aýylda  «Kelin túsirý» dástúrin kórsetse, «Uly ózgerister dáýi­rindegi» ekinshi aýylda 80-jyldardaǵy oktıabrıattar men pıonerler otrıadtary Almaty qalasynyń myń jyldyǵyna arnalǵan ánderden poppýrı oryndady. Al «Máńgilik El» jolynda» aýyly qazirgi órkendep, damyǵan Qazaqstannan kórinister kórsetip, tusaýkeser rásimin jasady. – Men «Bóbekke» birinshi ret kelip otyrǵanym joq, – dedi merekege qonaq retinde shaqyrylǵan ǵaryshker, «Halyq Qaharmany» Aıdyn Aıymbetov. – Bul ortalyq jaratylystaǵy jumbaq, tylsym syrlardy, sondaı-aq, balalar shyǵarmashylyǵyn, talantyn ashatyn keremet orta. Sizderge aıtaıyn, men úshin Ǵarysh «Bóbekten» bastaldy desem bolady. О́ıtkeni, 2014 jyly osynda ornalasqan, IýNESKO-nyń Halyqaralyq astronomııa jylyna sáıkes 2009 jyly ashylǵan keremet observatorııada astronomııadan ótken respýblıkalyq olımpıadaǵa qazylyq jasap, sońynan Naý­ryz merekesine qatystym. Son­da meni Sara Alpysqyzyna ǵaryshqa ushpaı qalǵan ǵaryshker retinde tanystyrǵan edi. Sara Alpysqyzy bolsa: «Aıdyn, aınalaıyn, amandyq bolsa, ǵaryshqa ushasyń!» dep batasyn bergen edi. Bir jyldan keıin ǵaryshqa ushtym. Sondyqtan, men úshin perishteler saltanat qurǵan «Bóbek» – qutty bilim oshaǵy. Sol úshin Astanadan arnaıy osy merekege qustaı ushyp jettim. О́z kezeginde qazaqtyń bulbul qyzy, Eńbek Eri, KSRO halyq ártisi Bıbigúl Tólegenova merekeden óte jaqsy áser alǵanyn jetkizdi. «Men ózi balalardy óte jaqsy kóremin, olarmen kezdesýge árdaıym qýanyp kelemin. Maǵan sondaı múmkindik týǵyzyp, balalardyń merekesine shaqyrǵan Sara Alpysqyzyna myń da bir rahmet! Qarap otyrsam, osy balalardyń úlken anasy, mamasy bolý qandaı keremet baqyt deseńizshi. Sondyqtan, ol kisige analyq alǵysymdy bildiremin. О́ıtkeni, elimizdiń birinshi hanymy retinde qol qýsyryp otyrmaı, óziniń múmkindigin paıdalanyp memleketimizdiń damyp, órkendeýine úles qosýda. Máselen, «Bóbek» ashylǵaly da shırek ǵasyr bolypty. Qazirdiń ózinde «Bóbekti» bitirgen túlekter óz dárejesinde bilim alyp, eline paı­dasyn tıgize bastady. Al myna búgingi bóbektikter solardyń izin basyp, Qazaqstannyń gúldenýine atsalysatynyna senimim mol», dedi ánshi apalary. Bóbektikterdiń kúshimen ót­ken gala-konsertte ulttyq kıim­derin kıip, totydaıyn taranyp, suńqardaıyn sylanǵan ónerpaz balalar mýzykalyq kompozısııa kórsetip, bı bılep, án aıtyp, kúı tartyp, kelgen qonaqtardyń kóńilin bir serpiltip tastady. Sýretterdi túsirgen Borıs BÝZIN