«Abadan» degen klýb bar

Týǵan aýylynan jan jylýyn aıamaǵan azamattan qalaısha aınalyp ketpeısiń?! Tarıhqa ataýy altyn áriptermen jazylǵan «Qoıandy jármeńkesi» oryn tepken aýyldyń oǵlany Nurlan Qaltaev – dál sondaı azamattyń ózi. Mine, birneshe jyldyń júzi bol­dy, bul jigit óziniń kindik qamy tamǵan Qoıandy aýylyna qolynan kelgen kómektiń bárin jasap keledi. Qarqaraly aýdanynda ornalasqan aıadaı aýylyna Allanyń úıi – meshit salyp, jamaǵattyń alǵysyn aldy. Mını-fýtbol alańqaıyn syıǵa tartyp, týǵan topyraqqa salamatty ómir saltynyń dánin septi. Byltyr, Qazaq handyǵynyń 550 jyldyq toıyna oraılastyryp, Qoıandyǵa 130 túp alma aǵashyn otyrǵyzyp, baý-baqshanyń qaq ortasynan sýburqaq ornatty. Endigi oıy otbasylyq balalar úıin salyp, jetimderdi sol jerge jıyp jarylqamaq. – Jyl saıyn «Aýyl kúnin» ótkizýdi dástúrge aınaldyrdyq. Qazaqtyń atyn búkil álemge tanytqan Qoıandy budan da zor qurmetke laıyq dep oılaımyn, – deıdi Nurlannyń ózi. Osy sharýanyń bárin Qara­ǵandyda otyryp-aq tyndyryp júr. «Mal – baqqanǵa bitedi» de­mekshi, eńbek etip, áreket jasaǵan adamnan qut-bereke qashqan ba?! Nurlannyń da qurylys salasynda dıirmenniń tasyndaı dóń­geletip otyrǵan azyn-aýlaq kásibi bar. Asyp-tasyp ketpese de, ózi­ne qa­raǵan elge qaraılasar qaý­qary­nyń bary ras. Búgingi kúnde kásipkerdiń oblys ortalyǵynda «Barakıat» degen halal meıramhanasy jumys istep tur. Bes ýaqyt namazyn qaza qylmaıtyn onyń aınalasy ımamǵa uıyǵan, ımanǵa bas ıgen azamattar... Jaqynda ol «Abadan» dep atalǵan kásipqoı jekpe-jek klýbyn quryp, soǵan oraı dos-jaran men sport janashyrlaryn jıyp, uıymnyń tusaýkeserin ótkizdi. Emin-erkin áńgime negizinde ótken bul sharada Nurlan Aıtmu­ham­betuly klýbtyń maqsat-múddesin málim etti. «Qazaq qasqyr áýeginiń kósemin «Abadan» deıdi eken. Kók­jal sekildi toptyń aldynda bolaıyq dep osy ataýdy tańda­dyq», – dep klýbtyń nege bulaı atalǵanyn da túsindire ketýdi umytpady. Endi bir az ǵana ýaqyttan keıin Nurlan Qaltaev qaraǵandylyq jekpe-jek sheberlerine tamasha tartý jasamaqshy. Ol – «Abadan» jekpe-jek klýbynyń jattyǵý zaly. Joba boıynsha, bul jańa ǵı­marattyń ishi jekpe-jek spor­tynyń zamanaýı talaptarǵa saı kerek-jaraqtarymen tolyqtaı jabdyqtalady. Zaldyń tórin segiz buryshty UFC jekpe-jegi ótetin alańqaı almaq. Qazirgi tańda negizgi qara jumystar bitip, ishki árleý syndy jeńil-jelpi sharýalar qalǵan. Qaırat ÁBILDINOV, «Egemen Qazaqstan» QARAǴANDY