AQTО́BE. 28 sáýir. Aqtóbe oblysynyń mádenıet, muraǵattar jáne qujattama basqarmasynyń basshylyǵymen oblystyq tarıhı-ólketaný mýzeıi jáne «Áıteke bı» atyndaǵy oblystyq meıirimdilik qory 1916 jylǵy ult-azattyq kóterilistiń 100 jyldyǵyna arnalǵan «1916 jylǵy ult-azattyq kóterilis: sebepteri, barysy, tarıhı mańyzy» atty oblystyq ǵylymı-tájirıbelik konferensııa ótkizdi. Bul týraly egemen.kz tilshisi habarlady.
Konferensııaǵa oblys zııalylary, tarıhshy-ǵalymdar, ólketanýshylar, Yrǵyz aýdanyndaǵy kóterilistiń basshysy Taıshym Orysulynyń urpaqtary, qala mektepteri men kolledj muǵalimderi, stýdentter qatysty.
Jıynda tarıh ǵylymdarynyń doktory, professor Nurtaza Abdollaev 1916 jylǵy ult-azattyq kóterilistiń sebepteri jóninde, tarıh ǵylymdarynyń kandıdaty, dosent Samat Esqalıev HH ǵasyrdyń basyndaǵy qazaq ıntellıgensııasy men azattyq kóterilisi, al Q.Jubanov atyndaǵy Aqtóbe óńirlik memlekettiák ýnıversıtetiniń aǵa oqytýshysy Aıshýaq Baqyt azattyq kóterilistiń tarıh sahnasyndaǵy orny men tarıhı roli týraly baıandady. Fılologııa ǵylymdarynyń doktory, professor Alpysbaı Musaev ult-azattyq kóterilistiń qazaq ádebıetindegi proza men poezııa janrlaryndaǵy kórinisteri jáıli áńgimeledi.
Qazaqstan Respýblıkasynyń mádenıet qaıratkeri, qurmetti professor Erkin Qurmanbek pen oblystyq tarıhı-ólketaný mýzeıiniń bólim meńgerýshisi Aıbek Ertemırov Yrǵyz ýezindegi ult-azattyq kóterilistiń barysy men onyń basshylary týraly zertteý jumystaryn júrgizgen tarıhshy-ǵalym Berkin Qurmanbekovtiń zertteýlerinen derekter keltirdi. Tarıh magıstri, oblystyq tarıhı-ólketaný mýzeıi dırektorynyń ǵylymı jumystar jónindegi orynbasary Arman Erjanov ult-azattyq kóterilis kezindegi qazaq kóshiniń qalyptasý tarıhyn baıandady.
Sonymen qatar konferensııa barysynda Torǵaı kóterilisi men onyń basshylary týraly da keńinen sóz boldy.
Mýzeıdiń ǵylymı kitaphanasy qorynan HH ǵasyr basyndaǵy Qazaqstannyń saıası-áleýmettik jaǵdaıyn sıpattaıtyn ǵylymı jáne ádebı kitaptardan kórme jasaqtaldy.
Satybaldy Sáýirbaı.
Derek, foto: egemen.kz
