Baqýatty turmys kózine aınalsa ıgi

Eldiń baıaǵy saýmal patrıottarynyń «babamyzdyń «aq bileginiń kúshimen, kók naızasynyń ushymen» qalǵan kıeli jeri saýdaǵa túskeli jatyr» degen dańǵazaly daýryǵýy el arasyna tez tarap, orynsyz renishke jel bergendeı boldy. Al shyndap kelsek, týǵan halqymyz úshin jerimizdiń kıeli ekendigi de, sol jeri úshin qanshama súrgin shaıqastardyń ótkendigi de, babalarymyzdyń qasıetti qanynyń tógilgendigi de aqıqat qoı. Olaı bolsa, sol kindik qanymyz tógilgen uly dalamyzdyń daý-damaıǵa sebep bolýy jurtymyzdy jańylysty qadamǵa jetelegendigin jasyryp qalmasaq kerek. Alaıda, naryqtyq qatynastyń qatal zańyn saralaı alsaq kóldeneń kók shybyqtyń da tegin, tekke jatpaıtyndyǵyna kóz jetkizdik emes pe. Endeshe, jer de óz halqymyzǵa qyıamet etip, baıandy, baqýatty turmysynyń qaınar kózine aınalsa nesi aıyp. Men agrarly, astyqty óńirdiń balasymyn. Keńes dáýirinde jerdiń ultaraqtaı kólemine deıin kádege asty. Mıllıon puttap astyq berdi. Endi myna jekeshelendirý kezinde sol jerdiń deni ıesiz qaldy, jýsan men qyzyl qýraıdyń astynda jatyr. Baıaǵy sharýa ózine tıesili jerin jetimsiretti, ıe bola almady. Jekelegen latıfýndısterdiń jemsaý­laryn paıǵa alǵan jerlerin tyǵyndaýmen otyr. Osy kelisimsiz jaǵdaıǵa ózimiz kináli bolmasaq, kimdi kinálaımyz. Jumystyń yńǵaıyna kóship, qybyn tapqandar jer súmesin emip, baıyp jatyr. Al ıkemsiz, jer qadirin qashyr­ǵandar taqyr kedeıge aınalýda. Buǵan da bireýdi aıyptaımyz ba? Sondyqtan Prezıdentimiz aıtqandaı, «Bizdiń mindet – jerdiń menshik ıesi bolyp, onyń durys paıdalanýy úshin Qazaqstan azamattaryna jerdi jekeshelendirý múmkindigin berý. Jer qýraı basyp, ıesiz jatpaı, túsiniksiz maqsatqa paıdalanylmaı, halyqtyń ıgiligine aınalýy kerek». Menińshe, aıtylǵan pikir esh bultaqsyz, ornyqty, oryndy aıtylǵan aıqyn tujyrym. Jasyratyny joq, áý basta jerdi jalǵa berý, satý sııaqty shetin máseleni bultaqsyz aıqyn túsindirý jetpeı jatty. Bul bósteki sózge jol ashyp, alypqashpa daý-damaıǵa alyp keldi. Men de óz elimniń, óz jerimniń perzenti bolǵandyqtan bul máselege nemquraıdy qaraı almaımyn. Sol sebepti de, máseleniń baıybyna baryp, sarabdal sabyrlylyqqa úndegim keledi. Biz úshin tap qazir orynsyz daý-damaıdan góri tynyshtyq, túsinistik qymbat. Táýelsiz memleketimizdiń basty múddesi de osyǵan saıady. Al týǵan jerdiń ár súıemi baǵa jetpes baılyq, uly kıemiz ekendiginde daý joq qoı. Tólegen QAJYBAI, jazýshy, Qazaqstannyń eńbek sińirgen mádenıet qyzmetkeri Kókshetaý