Eńbek etemin degen adamǵa jańasha múmkindik beredi

Sońǵy kezderi qo­ǵam­nyń keıbir toptaryn jer máselesi orynsyz alańdatyp otyr. Bul jaǵdaıǵa kóńil aýdaryp, alańdaýshylyq bildirip jatqandardy túsinýge de bolady. El men jerdiń taǵdyryna beı-jaı qaramaı, erkin eldiń ulandary óz oılaryn, pikirlerin ashyq bildirip jatqany da jón shyǵar. О́ıtkeni, jer degenimiz qazaqtyń jany. Ultymyzdyń basty baılyǵy sanalatyn osynaý ulan-baıtaq jerimizdi halqymyz týǵan Anasynan kem kórmeıdi. Áıtse de, bul máseledegi túsinbestik, jaǵdaıdy tereńirek bilmeýshilik áli de bizdiń keıbir azamattarymyzdy shatas­tyryp jatqan sııaqty. Keshe ǵana Astana tórinde ótken Qazaqstan halqy Assambleıasynyń HHIV sessııasynda Elbasymyz Nursultan Nazarbaev sońǵy kezderi Qazaqstannyń jerin sheteldikterge satý týraly jalǵan aqparattyń udaıy taratylýy saldarynan jer máselesine qatysty alańdaýshylyq kóbeıgenin qadap aıtty. «Munyń shyndyqqa janaspaıtyny birneshe ret túsindirildi. Taǵy da aıtqym keledi – aýyl sharýashylyǵy jerlerin shetel azamattaryna jáne kompanııalaryna satý týraly másele joq, talqylanbaıdy da. Bul taqyryptyń tóńiregindegi alyp-qashpa áńgimeniń bári negizsiz. Bizdiń maqsat – aýyl sharýashylyǵymen aınalysatyndarǵa jekemenshigine jer alý múmkindigin berý. Eger olar jerge ıelik etetin bol­sa, ony kútip-baptap, qadir­leıtin bolady. Jer – ata-babamyzdan muraǵa qalǵan bizdiń bas­ty baı­lyǵymyz», – dedi Qa­zaq­stan Prezıdenti. Mine, Elbasynyń osy sózi bul máseleniń túıinin tarqatyp bergendeı. Elbasy aıtqandaı, jer jalǵa berilýin qoldaımyn. Shynynda jer bos jatpaýy tıis. Ol tabys ákelýi qajet. Sondyqtan bul qadam jerge, elge degen janashyrlyqtan týyndap otyrǵany anyq. Bul qadam eńbek etemin, jerden nesibe tabamyn degen jandarǵa jańasha múmkindik beredi. Áıtse de, ár nársege baıyppen qaraý qajet. Jer – eshqashanda sybaılas jemqorlardyń saýdasyna aınalmaýy tıis. Elimizde Táýelsizdik týynyń jelbiregenine 25 jylǵa aıaq basty. Osynaý 25 jyldyń basty jańalyǵy – jańa sana qalyptasty. Jan-jaqty oılaıtyn jastarymyz ósip keledi. Mine, sol jastardyń jerge degen, jer óńdeýge degen qyzyǵýshylyǵyn arttyrýymyz kerek. Qashanǵy eldiń bári zańger, qarjyger, bıznesmen bola bersin?! Jastardyń eńbek etýge degen yqylasyn oıatý qajet. Osy jaǵynan kelgende elimizde qolǵa alynǵaly otyrǵan bul bastamany qoldaýǵa ábden bolady. Arǵynbaı BEKBOSYN, jazýshy, Qazaqstannyń eńbek sińirgen qaıratkeri TARAZ