Elektr qýaty eksporttalady

Prezıdent janyndaǵy Ortalyq kommýnıkasııalar qyzmetinde ótken baspasóz máslıhatynda «Samuryq-Energo» AQ basqarma tóraǵasy Almasadam Sátqalıev elektr energetıkasy salasyndaǵy atqarylyp jatqan jumystar legin baıan etti. Bul rette ol 5 ınstıtýttyq reformany júzege asyrýǵa baǵyttalǵan «100 naqty qadam» Ult Jospary barysynda elektr energııasy salasyna birqatar mindetterdiń júktelgenin jáne onyń qalaı atqarylyp jat­qandyǵyna toqtaldy. Elektr energııasy baǵytyndaǵy ma­ńyzǵa ıe bolyp otyrǵan energııamen jabdyqtaý, onyń senim­diligin qamtamasyz etý, jańa tehnologııalardy qoldaný men energııa tıimdiligin damytý jolynda sara saıasat­ty qolǵa alý máselelerin atap ótti. Naqtylaı aıtar bolsaq, Ult Josparyndaǵy bul salaǵa basymdyq berilgen 50, 51 jáne 52-qadamdar boıynsha jeke-jeke aıtyp ótken spıker, kompanııa elimizdegi «jasyl ekonomıkaǵa» kóshý jónindegi tujyrymdamaǵa saı balamaly energııa kózderiniń úlesin arttyrý maqsatyn kózdeıtinin kóldeneń tartty. Bul rette kompanııa tarapynan birqatar jobalar júzege asty. Atalǵan jobalar qatarynda 300 MVt-ǵa deıin qýatyn arttyrý kózdelgen Ereımentaý JES bar. Ol paıdalanýǵa engizilgen sátten bastap aǵym­daǵy jyl­dyń sáýirindegi jaǵ­daı boıynsha taza elektr energııasyn óndirý kólemi 140 mln. kVt/saǵatqa jetken. Jyl saıyn JES 45 110 myń tonna kómir jaǵýdyń aldyn alady, ol parnıktik gazdardyń shyǵarylýyn tó­men­detedi. Stansa óndiretin elektr energııasy EKSPO-2017 halyqaralyq kórme nysandary ınfraqurylymynyń muqtajdyqtary úshin paıdalanylatyn bolady. Sonymen qatar, «Samuryq-Energo» AQ ústimizdegi jyly Reseı men Qyrǵyzstannyń elektr energııasy kóterme naryǵynyń iri sýbektilerimen kelisimderge qol qoıdy. Taıaý shetelderge elektr energııasyn eksporttaý óndiristiń, qyzmettiń jáne tabystyń qosymsha kólemderin qam­tamasyz etedi. Bıyl Reseıge elektr qýatyn eksporttaýdyń kútiletin kólemi 1,8 mlrd. kVt/saǵ. bolyp otyr. Qazirgi jaǵdaıda eseptesek, eksporttyń kólemi 445,3 mln. kVt/saǵ-ty quraıdy. Al Qyrǵyzstanmen jasalǵan shartqa sáıkes, bıyl­ǵy jyly jetkiziletin elektr energııasynyń kólemi 218 mln. kVt/saǵ. quraıtyn bolady. Búginge deıin eksporttyń naqty kólemi 57,6 mln. kVt/saǵ. qurady. Sondaı-aq, transformasııa turǵysynda sóz órbitken spıker transformasııanyń «Samuryq-Energo» AQ strategııasyn iske asyrýdyń negizgi elementi ekendigin atap ótti. Transformasııa – kompanııanyń strategııalyq maqsattaryna jetý men básekege qabilettilik deńgeıin arttyrýǵa aparatyn jol. «Samuryq-Energo» AQ-ty transformasııalaý baǵdarlamasynyń negizgi mindeti – aksıoner úshin kom­panııanyń tabystylyǵyn ul­ǵaıtý maqsatynda holdıngti basqarýdyń, fýnksııalardy ortalyqtandyrýdyń, avto­mattandyrýdyń jáne ozyq álemdik tájirıbeni endirýdiń operasııalyq modeline kóshýge qoldaý jasaý bolyp tabylady. Transformasııalaý aıasyn­da Samuryq-Energo jańa uıymdyq qurylymǵa kóshýdi qamtamasyz etken. Elmıra MÁTIBAEVA, «Egemen Qazaqstan»