Ǵylym men óndiris ushtassa utady

Jaqynda «Matematıkalyq jáne kompıý­terlik modeldeý máseleleri» atty respýb­lıkalyq ǵylymı semınar ótti. Oǵan Qazaq­standyq matematıka birlestigi, elimizdiń Ulttyq ınjenerlik akademııasy men Ǵylymı jáne tehnologııalyq uıymdar qaýymdastyǵy uıytqy boldy. Semınarǵa akademık, Qazaq­stan­dyq matematıka birlestiginiń prezıdenti Baqytjan Jumaǵulov jetekshilik etti. Bul semınardy dástúrli deýge bolady. Toqsanyna bir ret ótkiziledi. Onda mate­matıkalyq modeldeý máseleleri, sheshý joldary, sandyq ádister men algorıtmderdiń damýy, kompıýterlik jáne aqparattyq júıeler, basqa da esepteýish, aqparattyq tehnologııalar qarastyrylady. Osy jolǵy semınardyń birinshi otyrysynda matematıkalyq jáne kompıýterlik modeldeýdiń jaı-kúıi týraly fızıka-matematıka ǵylymdarynyń doktory, professor Ýálıhan Ábdibekov baıandamasy tyńdaldy. Sonymen qatar, RǴA Sibir bólimi esepteýish tehnologııalar ınstıtýtymen baılanys jasaý keńinen aıtyldy. Aldaǵy jyly Astana qalasynda ótetin Túrik álemi matematıkteriniń VI halyqaralyq kongresin ótkizýge daıyndyq ta qarastyryldy. Osy kongress qurylǵan sátten bastap ol jahan­dyq pikirsaıys alańyna aınalyp, jańa ıdeıalardyń shoǵyrlanýyna yqpal etkenin atap aıtqanymyz jón. 2018 jyly Brazılııanyń Rıo-de-Janeıro qalasynda ótetin halyqaralyq matematıkter kongresine qazaqstandyq matematıkterdiń de qatysýy mańyzdy másele bolyp tabylaty­ny haq. Bul kongreske qatysýǵa akademık Tynys­bek Kalmenov bastaǵan matematık ǵalymdar usyndy. Semınardyń qorytyndysynda akademık Baqytjan Jumaǵulov Qazaq eli boıynsha matematıka jáne kompıýterlik modeldeý salasy boıynsha sapaly kadrlardy daıyndaý, olardyń áleýetin kóterý, halyqaralyq baılanysty nyǵaıtý, sonymen qatar, otandyq ǵalym­dardyń zertteý jumystarynyń nátıje­lerin gaz-munaı, ekologııa jáne basqa salalar­da da óndiriske engizýdi tıimdi paıdalaný qajet ekendigi týraly basa aıtty. Semınarǵa qatys­qan ǵalym-matematıkter biraýyzdan ǵy­lym men óndiristi ushtastyrý týraly ortaq baılam­ǵa kelip, usynys-pikirlerin ortaǵa saldy. Súleımen MÁMET, «Egemen Qazaqstan»