QOSTANAI. 28 sáýir. London olımpıadasynyń qola júldegeri, úsh dúrkin álem chempıony, boksshy Ivan Dychko oblystaǵy «Jastar esirtkige qarsy!» aksııasyna qatysty. Sharany Qostanaı oblystyq ishki ister departamenti esirtkimen kúres basqarmasy kolledjder stýdentteri úshin uıymdastyrdy. Bul týraly oblystyq ishki ister departmamenti baspasóz qyzmetine silteme jasaǵan egemen.kz tilshisi habarlady.
Aksııany uıymdastyrýshy oblystyq esirtkimen kúres basqarmasynyń jedel ýákili Aıgúl Erádilova jasóspirim kezinen sportpen shuǵyldanǵan ataqty boksshy Ivan Dychkony jastar úlgi alsyn dep shaqyrǵanyn aıtty.
Ol: «Mundaı kezdesýler elimizde salamatty ómir saltyn qalyptastyrýdaǵy nátıjeli qadamdar bolyp tabylady. О́ıtkeni, sport juldyzdarymen júzbe júz kezdesý jastarǵa oı salady. Bizge deni saý, shymyr jastar kerek», – dedi.
Ivan Dychko oblystaǵy mundaı aksııalardyń jıi qonaǵy bolady. Mysaly ol jaqynda sýısıdtiń aldyn alý týraly baıandalatyn áleýmettik rolıkke tústi. Jattyǵýlarynyń arasynda, jarysqa barmaǵan kezderinde ylǵı ýaqyt taýyp, jastarmen kezdesedi, olarǵa sport, boks týraly aıtyp otyrady.
«Sport – zııandy ádettermen kúresýdiń qýatty quraly. Bul jóninde men sharshamaı aıtyp kelemin», – dedi Olımpıada júldegeri. Sondaı-aq, ol jastarǵa óziniń sport joldarynan qyzyqty áńgimeler aıtty jáne aksııa bastalar aldynda jankúıerlerine qoltańba berdi. Polıseıler osy kezdesýde stýdentterge sıntetıkalyq esirtki zattarynyń jáne jastar arasynda tarap otyrǵan marıhýananyń zııany týraly derekti fılm men túrli rolıkter kórsetti.
Oblystyq narkologııalyq dıpanserdiń psıhology Alma Qulmuhambetova nashaqorlyqtan qalaı aýlaq bolý kerktigi jáne esirtkige elikkenderdi emdeýdiń qıyndyǵy týraly aıtyp berdi. Oblystyq dıspanserde qazir 50 aýrý emdelýde, ony 15-i nashaqorolar. Psıholog jaqynda spaıs dep atalatyn sıntetıkalyq esirtki zatty paıdalanǵan reseılik eki jastyń emdelgeni týraly aqparat aıtty. Esirtkiniń bul túri olardy estý qabyletinen aıyrǵan.
Mundaı aksııalar mektep oqýshylarynyń arasynda da ótip júr, olarmen kezdesýge de oblystaǵy belgili sportshylar shaqyrylady.
Názıra Járimbetova.
Derek, foto: Qostanaı oblystyq ishki ister departamentiniń baspasóz qyzmeti.
