Mereke aıasynda elordadaǵy 22 etnomádenı birlestiktiń ókilderi ózderiniń ulttyq taǵamdaryn daıyndap, dostyq dastarqanyn jaıdy. Atalǵan merekelik dastarqannyń uzyndyǵy 50 metrden asyp túskenin aıryqsha atap ótken jón. Sondaı-aq, ózge etnos ókilderi qoldanbaly óner kórmesin ótkizip, ulttyq qundylyqtaryn nasıhattady. Sonymen qatar, «Báıterek» monýmenti mańynda da merekelik konsertter uıymdastyrylyp, otandyq estrada juldyzdary jınalǵan qaýymǵa kóterińki kóńilkúı syılady. Odan bólek, «Atameken» Qazaqstan kartasy» etno-memorıaldyq kesheninde ótken «Tatýlyqtyń tal besigin terbetken» atty konserttik baǵdarlama merekeniń mereıin asyryp, ajaryn aıshyqtaı tústi. О́z kezeginde Astana qalasynyń ákimi Ádilbek Jaqsybekov shahar turǵyndary men qonaqtaryn atalǵan merekemen quttyqtap: «1 mamyr – jalpy qazaqstandyqtar bolyp toılaıtyn mereıli kún. Halqymyzda «Jeńis túbi – erlik, bereke túbi – birlik» degen qanatty sóz bar. Qoǵamnyń tutastyǵy qaı kezde de ishki tatýlyq pen berekeden bastaý alǵan. Yntymaǵy jarasyp, túrli ulystyń basyn qosqan qasterli qazaq topyraǵy tynyshtyq pen beıbitshiliktiń qarashańyraǵyna aınaldy. Árdaıym ishki tatýlyǵymyz berik bolyp, elimiz órkendeı bersin», – dedi. Jalpy, bul kúni elordalyqtar 450-ge jýyq óner adamy men shyǵarmashylyq ujym ókiliniń ónerin tamashalady. Birlik pen tatýlyqtyń jarshysy bolǵan merekelik sharalar «Astana Opera» memlekettik opera jáne balet teatrynda, M.Gorkıı atyndaǵy orys drama teatrynda, «Qýyrshaq teatrynda», «Stýdenttik» saıabaǵynda jáne taǵy basqa oryndarda laıyqty jalǵasyn tapty. Esil ózeniniń sol jaǵalaýynda beıbitshilik pen birliktiń belgisi retinde áýege aq sharlar ushyryldy. Merekege oraı ótken is-sharalar sapynda belgili ánshi Saıat Medeýovtiń «Otanym meniń» atty shyǵarmashylyq keshi men astanalyq teatr ónerpazdarynyń uıymdastyrýymen júzege asqan «Bir shańyraq astynda!» atty arnaıy joba da halyqty shat-shadyman kúıge bóledi. Osylaısha, saǵat 23:00-ge deıin jalǵasqan atalǵan mádenı is-sharalar Astana jurtyn aıryqsha áserge bólep, kóńilderine qýanysh syılady.
Elaman QOŃYR, «Egemen Qazaqstan»
Aqtaý. Aqtaý qalasynda Qazaqstan halqynyń birligi kúni merekesinde «Astana» alańynda etnomádenı birlestikter ókilderiniń qolóner buıymdarynyń kórmesi uıymdastyryldy. Tórt jartylaı kıiz úı syndy orynda ár ult ókilderi ózderiniń qoldarynan týǵan sheberlikteriniń beınesin jalpaq jurttyń nazaryna usyndy. Alańnyń ortasyna tigilgen kıiz úıde Qazaqstan halqy Mańǵystaý oblystyq Assambleıasy hatshylyǵynyń uıymdastyrýymen ulttyq qýyrshaqtar men ulttyq kıimderdiń kórmesi ótkizildi. «Aqbota» alańynda taýar óndirýshilerdiń kórmesi júrip jatty. Birlik merekesine oraı «Qoǵamdyq kelisim» memlekettik mekemesinde «Halyq kelisimi» qoǵamdyq birlestiginiń tuńǵysh tóraǵasy Jazdyrhan Seıdalıevke arnalǵan burysh ashyldy. Sondaı-aq, Mańǵystaý týrızm kolledjinde ár ult ókilderi men kolledj stýdentteriniń atsalysýymen «Biz birgemiz jáne bul – bizdiń jetistigimiz» atty festıval uıymdastyryldy. Kolledj basshylyǵy oqý ornynyń aýlasynda etnoaýyl ashty. Bul aýylda ár ulttyń bir belgisi nemese ereksheligi kórinis tapqan. Uıymdastyrýshylar bolsa, etnoaýyldy odan ári damyta túsemiz dep otyr.
Gúlaıym ShYNTEMIRQYZY, «Egemen Qazaqstan»
Aqtóbe Aqtóbe óńirinde bıylǵy kóktem jaýyndy-shashyndy bolyp tur. Mamyrdyń alǵashqy tańy da aq jaýynmen atty. Kóktemgi jaýynnan keıingi saýmal samal kókiregińdi kerneıdi. Aǵashtar búr jaryp, qala kósheleri jasaryp qalǵandaı áserge bóleıdi. Kóshelerdegi qımyl-qozǵalys ta ádettegiden erte bastalǵandaı. Onyń da sebebi bar, qalalyqtar Qazaqstan halqynyń birligi kúnin merekeleýge asyǵýly. Merekeniń basty sharasy «Dostyǵymnyń aınasy – Táýelsiz Qazaqstan» halyqtyq jıyny ótetin Tuńǵysh Prezıdent N.Nazarbaev atyndaǵy Ortalyq saıabaq saltanaty bárinen ózgeshe. Qyzyldy-jasyldy jalaýlar jelbireıdi. Ádemi bezendirilgen sahnadan eldikti jáne birlikti dáriptegen asqaq áýender tógilýde. Transparanttar men úndeýler, týlar kótergen qalalyqtar osynda aǵylýda. Áp sátte-aq alańǵa qalalyqtar mol jınaldy. Merekelik saltanat shymyldyǵy oblys ortalyǵyndaǵy 19 etnomádenı birlestiktiń bı ansamblderiniń qoıylymymen ashyldy. Sahna tórine oblys ákimi Berdibek Saparbaev kóterilip, merekege jınalǵan qalalyqtar men qala qonaqtaryna quttyqtaý sóz arnady. – Bul mereke – qazaqstandyqtar úshin aıryqsha mańyzdy ulyq meıram. Kópultty memleketimiz 25 jylda zor jetistikterge jetti. Bul – elimizdegi ulttar men ulystardyń dostyǵy men tatýlyǵynyń arqasy. Elbasy N.Nazarbaev osy birligimizdi, turaqtylyǵymyzdy kózdiń qarashyǵandaı saqtaýdy udaıy aıtyp keledi. «Birlik bar jerde tirlik bar» degendeı, biz osy sútteı uıyǵan tatýlyǵymyzdy saqtaý jolynda eńbek etip, ómir súrýimiz kerek, – dedi óńir basshysy. Mereke saltanaty 19 etnomádenı birlestik kórkemónerpazdarynyń gala- konsertine ulasty. Bı bılenip, kúı kúmbirledi, alýan tilde shyrqalǵan ásem ánder kók aspandaǵy kempirqosaqtaı kelisim taýyp jatty. Merekelik sharalar ótkizilgen jerlerde saýda uıymdastyryldy. Qaladaǵy sport alańdary men gúlzarlarda túrli sporttyq oıyndar qyzdy.
Satybaldy SÁÝIRBAI, «Egemen Qazaqstan»
Atyraý. Táýelsiz elimizdiń basty qundylyǵynyń qataryndaǵy birlik pen dostyqty, tatýlyq pen kelisimdi saqtaýǵa ár azamattyń múddeli ekenin atyraýlyqtar da árkez esten shyǵarmaıdy. Munyń aıqyn kórinisi jyl saıyn keń kólemde atalyp ótiletin Qazaqstan halqynyń birligi kúni merekesinde ǵana emes, udaıy bekemdigimen dáleldenip keledi. Máselen, «Tatýlyk» tatar-bashqurt etnomádenı birlestiginiń jetekshisi Gúlsına Baıkenovanyń aıtýynsha, elimizdi baqytty mekenine balap, ósip-ónip jatqan san alýan etnostar úshin birliktiń týy bıik bolýynan asqan qundylyq bolmaıdy. El ekonomıkasynyń órkendeýi de ishki turaqtylyq pen tatýlyqtan bastaý alady. Iá, bul – tek bir ǵana etnomádenı birlestik jetekshisiniń ǵana pikiri emes, elimizdiń kók baıraǵynyń kókte máńgi jelbiregenin qalaǵan barshanyń kókeıinde mazdaǵan asyl murat. Bul pikirimizdiń durystyǵyn keshe Atyraýdaǵy «Isataı-Mahambet» alańynda myńdaǵan turǵyndarǵa merekelik kóńil kúı syılaǵan «El qýaty – birlik pen tatýlyq!» atty teatrlandyrylǵan dýmandy-sazdy baǵdarlamadan anyq ańǵara aldyq. Ári dýmandy, ári sazdy baǵdarlamaǵa arqaý etilgen teatrlandyrylǵan kórinister ár etnostyń ókilderiniń táýelsiz Qazaqstandy qarashańyraǵyna balaıtyndyǵymen, eń bastysy – eldegi birlik pen tatýlyqty tý etetindigimen erekshelenip turdy.
Joldasbek ShО́PEǴUL, «Egemen Qazaqstan»
Kókshetaý. Jyl saıyn maǵynasy tolyǵyp otyratyn meıramdardyń qundylyǵy kóp ekendigin sezinip otyrmyz. Máselen, Kókshetaýdaǵy Qazaqstan halqynyń birligi merekesi júrek tebirenterlik dárejede ótti desek, jarasatyndaı. Halyq «Máńgilik El» ıdeıasynyń jarqyn jeteginde boldy. Táýelsizdik alańynda oblys ákimi Sergeı Kýlagın kórkeıip kele jatqan qala turǵyndary men qonaqtaryn ulyq merekemen quttyqtady. Alashadaı aýqymdy alatyn ekrannan óńir tirshiligi tizbelenip jatty. Etnomádenı birlestikter búgin bar jasaýyn taǵynyp, ulttyq ustanymdaǵy qundylyqtaryn kórsetip jatyr. Ortalyq saıabaqta óz-ózinen «Dostyq dańǵyly» paıda bola qalypty. Shyndyǵynda solaı boldy. Mereke «Dostyǵymyz jarasqan elmiz» uranyn kóterip turdy. Oblystaǵy 128 ult pen ulys ókilderi ulyq ustanymdarymen kóńildi kókke órletti. Jurtshylyqtyń jappaı qol soǵýy el yrysy men berekesiniń ortaımaıtynyn aıǵaqtaǵanyn aıtqymyz keledi.
Baqbergen AMALBEK, «Egemen Qazaqstan»
Qaraǵandy. Kenshiler astanasy 1 mamyr – Qazaqstan halqynyń birligi kúni merekesin keńinen atap ótti. Merekeniń negizgi sharalary qaladaǵy ortalyq saıabaqta boldy. Munda oblystyq Qazaqstan halqy Assambleıasy fılıalynyń uıymdastyrýymen etnomádenı birlestikterdiń festıvali ótti. Bul sharada óńirdegi dostyqtyń dánekeri bolyp júrgen ujymdar kórermender aldynda óner kórsetip, elimizdegi tatýlyq pen tynyshtyqty dáriptedi. Merekelik ortaǵa arnaıy kelgen oblys ákimi Nurmuhambet Ábdibekov jıylǵan qaýymdy Qazaqstan halqynyń birligi kúni merekesimen quttyqtady. Sonymen qatar, óńir basshysy etnomádenı birlestikterge arnaıy granttar tabys etti. Jalpy, bul kúni Qaraǵandynyń ortalyq saıabaǵy qýanysh pen shattyqtyń ordasyna aınaldy. Aýqymdy sharany ótkizýshiler qala turǵyndary men qonaqtaryna arnap túrli sharalardy uıymdastyrdy. Munda sandaǵan ult pen ulys balalarynyń án-bıinen bólek, basqa da mádenı sharalar, kórmeler men sport jarystary ótkizildi. Taǵy bir aıta ketetin oqıǵa, mereke qarsańynda oblys ákimi Nurmuhambet Ábdibekov «О́ńirlerdi 2020 jylǵa deıin damytý» baǵdarlamasy boıynsha oblys ortalyǵynda salynǵan kópqabatty turǵyn úıdiń tusaýkeserinde bolyp, baspanaly bolǵan 30 otbasyna páterlerdiń kiltin saltanatty jaǵdaıda tapsyrdy. «Merekedegi eń basty syı – baspanaly bolý. Bizdiń azamattarǵa jaqsy jaǵdaı jasaý, onyń ishinde baspanamen qamtamasyz etý – Memleket basshysy Nursultan Nazarbaevtyń jergilikti bılik organdarynyń aldyna qoıǵan basty mindetteriniń biri», – degen óńir basshysy qýanyshy qoınyna syımaı turǵan aǵaıyndy Birlik kúni merekesimen jáne de qonys toılarymen quttyqtady.
Qaırat ÁBILDINOV, «Egemen Qazaqstan»
Qostanaı. – Ulttyq birlik, halyq dostyǵy bizde tek aýyzben aıtyla salǵan ásireqyzyl sóz emes, bul – bizdiń kúndelikti ómirimizdiń shynaıy kórinisi. Kitaphanada ardagerler, túrli ulttyq-mádenı ortalyqtar, mektep oqýshylary qyzyqty jumystar júrgizedi. Byltyrdan beri sharalardyń barlyǵy úsh tilde ótedi. Mektep oqýshylary muny dástúrge aınaldyryp, úırenip keledi. Búgin kórmege Táýelsizdiktiń 25 jyldyǵyna oraı tarıhymyzdan syr shertetin kitaptar, birligimizdi pash etetin fotoalbomdar ákeldik. Onyń syrtynda braıler kitaptarymyz taǵy bar. Jyl boıy kózi kórmeıtin kisilerge osyndaı kitaptar jetkizip berip otyramyz, olardyń ózi túrli ult ókilderi ǵoı. Alǵysyn jaýdyryp qalady, – deıdi Qostanaı qalalyq ortalyqtandyrylǵan kitaphanalar jelisi mekemesiniń dırektory Aıgúl Seıdahmetova. Aıshyqty merekede qostanaılyqtar men qala qonaqtary úshin án men kúıden shashý shashyldy. Oblys ákimi Arhımed Muhambetov bastaǵan oblys jáne qala basshylary turǵyndardy Qazaqstan halqynyń birligi kúni merekesimen quttyqtady. – Elbasy Nursultan Nazarbaevtyń kemel saıasaty arqasynda Qazaqstanda eldiń birligi, halyqtyń tatý-tátti tirligi saqtalyp otyr. Halyq dostyǵynyń qazaqstandyq úlgisin álem jurty moıyndady. Bizdiń elimizde ár ulttyń, ulystyń dástúrin, saltyn saqtaýǵa, damytýǵa tolyq jaǵdaı bar. Máńgilik El – bizdiń bolashaǵymyzdyń, dostyǵymyzdyń, birligimizdiń negizi, – dedi oblys ákimi Arhımed Begejanuly. Oblys ákimi óńirdegi dostyqqa, ult pen ulystar arasyndaǵy tatýlyq pen beıbitómirdiń saltanat qurýyna úles qosyp júrgen ulttyq-mádenı birlestikter jetekshilerin Qazaqstan halqynyń birligi kúni merekesimen quttyqtap, maqtaý qaǵazdaryn tabys etti.
Názıra JÁRIMBETOVA, «Egemen Qazaqstan»
Qyzylorda. Qyzylordada Birlik merekesi «Gúldengen Qazaqstan» áninmen bastaldy. 150 baladan quralǵan hor án shyrqap turǵanda «Táýelsizdikke – 25 jyl» degen jazýy bar býma shar men 25 aq kógershin ushyryldy. Merekege jınalǵan jurtshylyqty aımaq basshysy Qyrymbek Kósherbaev quttyqtady. – Asqaq eldik murattarymyz oryndalyp, óreli isterimiz jalǵasyn tapsyn. Alashtyń anasy, qazaqtyń kıeli mekeni – Syr topyraǵynda birliktiń besigin birge terbetken ulttar men ulystardyń tatýlyǵy ár shańyraqqa bereke syılap, barsha qazaqstandyqtarǵa altyn tuǵyr bolsyn, – dedi ákim. Bul mereke birlik pen dostyqtyń sımvoly ǵana emes, Qazaqstandy Otanym dep sanaıtyn barsha túrli ult ókilderiniń mádenıetine, tiline degen úlken qurmetti kórsetedi. Mundaı birlik pen úılesimdilik máńgi bolsyn. Sondaı-aq, Ortalyq alańda ulttyq sport túrlerinen jarystar uıymdastyryldy. Merekege oraı Qyzylorda qalasynda 5 kópqabatty úı paıdalanýǵa berilip, turǵyndarǵa kiltteri tapsyryldy. «Men búgingi qýanyshymdy aıtyp jetkize alar emespin. Páter alý qashannan armanymyz bolatyn. Birlik merekesi kúni óz baspanamyzǵa qol jetkizgenimizge qýanyshtymyz», – deıdi jańa páter ıesi Baqyt Nasyrova. Solaısha, Syr eli halyq dostyǵy merekesin óz dárejesinde atap ótti.
Erjan BAITILES, «Egemen Qazaqstan»
Oral. Bıyl Oral óńirindegi birqatar etnomádenı birlestik ókilderi merekeni ótkizýdiń buǵan deıingi úlgilerine ózgerister engizý jáne oǵan jańasha sıpat berý jóninde Batys Qazaqstan oblystyq Qazaqstan halqy Assambleıasy keńesine birqatar usynystar berdi. Atalǵan keńes óz otyrysynda olardyń talap-tilekterin qanaǵattandyrdy. Soǵan sáıkes, Qazaqstan halqynyń birligi kúni qurmetine Oral qalasy men barlyq aýdan ortalyqtarynda mazmuny tereń, shoqtyǵy bıik 27 is-shara ótkizildi. Sonymen birge, osy joba aıasynda «Qazaqstan halqy – Bolashaǵy Birtutas El» ǵylymı-tájirıbelik konferensııa uıymdastyryldy. Buǵan qosa mereke qarsańynda «Beıbitshilik pen kelisimniń jol kartasy» atty jarqyn da jasampaz jobanyń tusaýy kesildi. Ári osy oraıda óńirdegi óner ujymdary arasynda oblystyq festıval bastaý aldy. Bul baǵdarlama jyl aıaǵyna deıin sozylmaq. Batys Qazaqstandaǵy bıylǵy 1 mamyr merekesi Táýelsizdiktiń 25 jyldyǵyna arnaldy. Oblys ortalyǵyndaǵy 25 orynda 25 shara ótkizilgeni osyǵan taǵy bir dálel. Onyń ózeginde «Máńgilik El» taqyrybynda dárister oqyldy. Kórmeler uıymdastyryldy. «Birligimiz jarasqan» atty konserttik baǵdarlamalar márege jetti. – Oral óńirindegi bıylǵy Birlik kúni ózgeshe sıpat aldy. Ári buǵan deıingi uıymdastyrylǵan merekelerge qaraǵanda áldeqaıda tartymdy, áldeqaıda qyzyqty ári barynsha keń aýqymda ótkizildi. Buǵan bárimiz de súısindik. Oblystyń ortalyq alańynda qurylǵan etnoaýyldarda da sheber qoldardyń izderi men shyǵarmashylyq ushqyr oıdyń jemisi atoılap turdy. Bıylǵy 1 mamyr merekesi bárimizdiń kóńilimizden shyqty. Bárimizge unady. Aldaǵy jyldarda da onyń osyndaı pishimde ótkizilgenin qalaımyz, – dedi gazet tilshisine óńirdegi «Dos» qoǵamdyq birlestiginiń tóraıymy V.Shohına. Batys Qazaqstan oblysynyń ákimi Altaı Kólginov: «Bizdiń bárimiz úshin eń keregi osyndaı tatý-tátti qarym-qatynastar», – dedi.
Temir QUSAIYN, «Egemen Qazaqstan»
О́skemen. Shyǵys óńirinde Birlik kúni keńinen atalyp ótti. Is-sharalar erteńgilik oblys ortalyǵynyń Qazaqstan kóshesindegi jergilikti kásiporyndar avtokólikteriniń Memlekettik týlarmen aıshyqtalǵan kolonnasynyń sherýimen bastaldy. «Meniń Týym» sharasy qalanyń negizgi kóshelerin aralap shyqqannan keıin Respýblıka alańynda «Jasampazdyq pen yntymaqtyń 25 jyly» atty merekelik is-sharalar legi ótti. Bul baǵdarlama aıasynda etnomádenı birlestikter men shyǵarmashylyq ujymdardyń qatysýymen konsert, sporttyq oıyndar, saýda-sattyq jáne qolóner sheberleriniń kórmesi uıymdastyryldy. Sondaı-aq, «Metallýrg» saıabaǵy saltanatty túrde ashylyp, shahardyń barlyq saıabaqtarynda merekelik konsertter men balalarǵa arnalǵan túrli oıyn-saýyqtyq sharalar ótti. Tús áletinde qaladaǵy sýburqaqtar, onyń ishinde Ertis ózeni jaǵalaýyndaǵy amfıteatr alańynda, «Úlbi» ortalyq mádenıet úıi, oblystyq meshit jáne Gorkıı men Kırov kósheleri qıylysyndaǵy alańdardaǵy sýburqaqtar iske qosyldy. Tústen keıin Abaı eskertkishi aldynda «Avtoekzotıka-2016» avtoshoýy uıymdastyrylyp, «Jastar» saıabaǵynda Pasha merekesine oraı buqaralyq seıil, Dostyq úıi janynda oblystyq óner ujymdarynyń konserti ótti. Folklorlyq ansamblder ulttyq salt-dástúrlermen tanystyrdy. Al keshkilik oblys ortalyǵynda «Stýdent kóktemi-2016» gala-konserti jastardyń bı keshimen jalǵasty. Aıta ketelik, Birlik kúni merekesi aıasynda óńirdiń barlyq qalalary men aýdandarynda mazmundy merekelik is-sharalar uıymdastyrylyp, halyqtyń tatýlyǵy men yntymaǵy taǵy da pash etildi.
Dýman ANASh, «Egemen Qazaqstan»
Pavlodar. Merekeden bir kún buryn oblys ortalyǵyndaǵy Dostyq úıinde oblys ákimi Bolat Baqaýov óńirdiń etnomádenı birlestikteriniń ókilderine arnaıy granttar tabys etti. Bıylǵy Qazaqstan halqynyń birligi kúni merekesi qarsańynda el Táýelsizdiginiń 25 jyldyǵy, «Máńgilik El» jalpyulttyq patrıottyq aktisi qabyldandy. El birligi arqasynda reformalar júzege asýda. Osy jaqsy jańalyqtardyń sońyn búgin qala turǵyndary, qonaqtar jańadan paıdalanýǵa berilgen Iý.Gagarın atyndaǵy qalalyq mádenıet jáne demalys saıabaǵynda jarqyn kóńil-kúımen jalǵastyrdy. Qaladaǵy horeografııalyq óner ujymdary «Táýelsizdik saltanaty» atty kók jalaýshalar jelbiretip, erekshe kompozısııalyq kórinister kórsetti. Oblys basshylyǵy, soǵys jáne eńbek ardagerleri, jastar quttyqtaý sózderin arnaýda. Án shyrqaǵan, bı bılegen qýanyshty jastar, qyzyl-jasyl sharlar kótergen kishkentaı bóbekter aınalanyń sánin keltirdi. Saıabaqtan kompozısııalyq qoıylym arqyly jasalǵan «Dostyq pıramıdasy» da kórindi. «Máńgilik El» atty flesh-mobta «Shernııaz» horeografııalyq ujymy, etnomádenı birlestikter qatysty. Saıabaq ishinde «Áýender birligi» degen bólimde áıgili «Dos-Muqasan» ansambli óner kórsetti. Dál osy alańda. «Jasmın» jáne «Nadejda» bıshileri qazaq bılerin bıledi. Qalalyq mádenıet bóliminiń basshysy Ardaq Raıymbekovtiń aıtýynsha, ǵajaıyp bı festıvaline jergilikti horeografııalyq ujymdarmen birge Reseıdiń Máskeý, Barnaýl, Omby bıshileri qatysyp, óner kórsetti. Jáne «Báke men Sáke» saıabaqqa jınalǵan jurtshylyqty kóńildi ázilderimen kúldirip jatty. Mereke sońy «Ult birligi – uly baılyq» atty merekelik konsertke ulasty.
Farıda BYQAI, «Egemen Qazaqstan»
Petropavl. Oblys ortalyǵynan bastaý alǵan mereke barlyq aýdandarda joǵary kóńil-kúımen jalǵasyp, bir shańyraq astynda turatyn halyqtyń ulttyq qundylyqtary men salt-dástúrleri pash etildi. Ortalyq alańdaǵy «Bolashaǵymyz birlikte» atty saltanatty merekeniń ashylýynda sóılegen sózinde aımaq basshysy Erik Sultanov turǵyndardy Táýelsizdigimizdiń 25 jyldyǵy qarsańynda atalyp jatqan aıtýly meırammen quttyqtap, Elbasy negizin qalap bergen barlyq etnostardyń teń quqyqtyǵyna negizdelgen qazaqstandyq damý jolyn álemdik qoǵamdastyq joǵary baǵalaıtynyn atap ótti. Budan keıin eńbekte, otbasynda tamasha ónege-úlgi kórsetip, jas urpaq tárbıesine belsene atsalysyp júrgen bir top tańdaýlylar marapattaldy. Etnomádenı birlestikterdiń tóraǵalaryna 100 myń teńgeniń sertıfıkaty tabys etildi. Konserttik baǵdarlama aıasynda yntymaq-birligi jarasqan eldiń ónerpazdary ár tilde ánder shyrqap, myń buralǵan bılermen tamsandyrdy. «Dostyq» úıi aldynda ulttyq mádenı festıval uıymdastyrylyp, ozyq salt-dástúrler men ádet-ǵuryptar úlgi etildi. «Qyzyljar sý» kásipornynda «Baýyrsaq jáne kýlıch» kúni uıymdastyrylýy, Qazaqstan halqy Assambleıasynyń qoǵamdyq keńesiniń qurylýy aıshyqty oqıǵalardyń biri boldy. Ulttyq ulanǵa qarasty Petropavl áskerı ınstıtýtynda halyq dostyǵy festıvali óz jalaýyn kóterip, túrli kompozısııalyq qoıylymdar kórsetildi. Adam janyn sergitip, boıynda elge, jerge degen joǵary rýh darytatyn shattyq áýender jer-jerlerde erekshe jarasym tapty.
О́mir ESQALI, «Egemen Qazaqstan»
Taraz. Turaqtylyq negizi – tatýlyq. Al tatýlyq kez kelgen eldi, halyqty tek jaqsylyq pen yntymaqqa, kelisimge jeteleıdi. Bereke men birliktiń týy jelbirep, eńbek pen dostyqtyń kúıin shertetin, tatýlyqtyń ǵajap úlgisin kúlli álemge pash etetin osynaý merekeni jambyldyqtar keń kólemde atap ótti. Birligi berekeli, tirligi merekeli, yntymaǵy jarasqan eldiń ǵana yrys-nesibesi mol bolmaq. Ultaralyq kelisim men berekege bastar birliktiń arqasynda ekonomıkamyz qaryshtap damyp, turmysymyz jyldan jylǵa jaqsara túsýde. Bul – búkil qazaqstandyqtardyń eńbeksúıgishtigi men toptasqandyǵynyń nátıjesi! Mereke kúni Tarazdyń ortalyq alańdary men kóshelerinde konserttik baǵdarlamalar uıymdastyryldy. Qala turǵyndary «Mamyr» saıabaǵynda ár túrli ult ókilderiniń ónerlerin tamashalady. Sondaı-aq, jergilikti joǵary oqý oryndary ǵylymı-tájirıbelik konferensııa ótkizse, oblystyq etnomádenı birlestikter «Úlken el – Úlken otbasy» festıvaline qatysty. Bir sózben aıtqanda, barsha jambyldyqtar týǵan eldiń týynyń astynda toptasty, týǵan jerdiń tuǵyryn bıik etti. Iаǵnı, damyǵan elderdiń qataryna enýdi mejelegen memleketimizde beıbitshilikti nyǵaıtyp, yntymaq pen birliktiń týyn bıikke kóterý – bárimizdiń asyl muratymyz. Osynaý maqsat-múddelerdiń oıdaǵydaı júzege asýy eń aldymen árbirimizdiń qajyrly da qaıratty eńbegimizge, ózara túsinistik pen yntymaqqa, elimizdegi ishki saıası turaqtylyqqa, ultaralyq jáne ult ishindegi parasattylyqqa tikeleı baılanysty. Ulttyq birligimiz nyǵaıyp, tatýlyǵymyz baıandy bolsyn!
Oralhan DÁÝIT, «Egemen Qazaqstan»
Taldyqorǵan. Taldyqorǵandaǵy «Jastar» mádenı-demalys saıabaǵynda Qazaqstan halqynyń birligi kúni jalpyhalyqtyq turǵyda merekelendi. Etnomádenı birlestikterdiń uıytqy bolýymen óńirde turatyn túrli etnos ókilderi ulttyq kıimderin jarastyra kıip, óz ulttarynyń qundylyqtaryn jarysa kórsetti. Ulttyq ashanalar da tizile elge qyzmet jasady. Dúıim jurttyń aldyna Almaty oblysynyń ákimi Amandyq Batalov shyǵyp, yntymaq pen birlik, tatýlyq týraly quttyqtaý sóz sóıledi. Merekeniń sánin mektep oqýshylary túrli ult kıimderin kıip, sol elderdiń ulttyq bılerin bılep kirgizdi. Ásirese, «Qara jorǵa» bıin naqyshyna keltire bılegende razy bolǵan halyq bir serpilip qaldy. Sondaı-aq, qazaq, uıǵyr, ózbek jáne taý halyqtarynyń bılerin de bizdiń búldirshinderimiz tamasha tartý retinde pash ete bildi. Bul mektep oqýshylarynyń jyldar boıy tynbaı jattyqqandyqtaryn aıqyn kórsetip turdy. Ony kóre de, baǵalaı da bilgen lázim. Konserttik baǵdarlama Súıinbaı atyndaǵy oblystyq fılormonııa ártisteri, qazaqstandyq estrada juldyzdary men Almaty oblystyq Qazaqstan halqy Assambleıasy fılıaly uıymdastyrǵan án shashýmen jalǵasty.
Nurbol ÁLDIBAEV, «Egemen Qazaqstan»
Shymkent. Oblystyq orys drama teatrynda 1 mamyr – Qazaqstan halqynyń birligi kúnine arnalǵan «Birlik. Yntymaq. Dostyq» merekelik sharasy ótti. Qazaqstan Táýelsizdiginiń 25 jyldyǵy aıasynda ótken merekelik sharaǵa qatysqan óńir basshysy Beıbit Atamqulov jınalǵandardy jáne barsha ońtústikqazaqstandyqtardy Birlik kúni merekesimen quttyqtady. Saltanatty jıynda oblys basshysy eldegi etnosaralyq tatýlyq pen qoǵamdyq-saıası turaqtylyqty saqtaýǵa súbeli úles qosqan birqatar azamattarǵa Elbasynyń atynan Alǵys hat pen «Birlik» altyn medalin tabystady. Sonymen qatar, óńirdiń áleýmettik-ekonomıkalyq damýyna jáne qoǵamdyq-saıası ómirine belsene qatysqany úshin 20 azamat «Oblys ákiminiń alǵys hatymen» marapattaldy. Túrli ult ókilderiniń qatysýymen ótken merekelik shara «Báıterek» kompozısııasy men «Sarjaılaý» horeografııalyq qoıylymymen bastaý alsa, yntymaǵy jarasqan túrli etnos ókilderiniń ónerpazdary án shyrqap, óner kórsetti. Ońtústik Qazaqstanda búgingi tańda 100-den astam etnos pen 11 dinı konfessııa ókilderi tatý-tátti ómir súrip, birlese eńbek etip keledi. Aıta keteıik, bıyl oblys ákimdiginiń bastamasymen óńirimizde alǵash ret Birlik merekesin toılaý sheńberinde «Dostyq syıy» sharasy ótti. Igi shara aıasynda aımaqtaǵy etnomádenı birlestikterdiń músheleri bir-birine syı jasap, ózara tatýlyǵyn nyǵaıta tústi.
Baqtııar TAIJAN, «Egemen Qazaqstan»
