Múgedek dep muqatýǵa bola ma?

Redaksııamyzǵa janaıqaıyn jetkizgen hat kelip tústi. Onda Aısha Muqanova atty Astana turǵyny janynyń japa shegip jábirlengenin aıtyp, muńyn shaǵypty. Oqıǵa qalaı bolǵan? Osy jyldyń 8 qańtarynda Aıshany týysy Marına Tólegenova qurbysy Dana­gúl Seıitbekovamen birge týǵan kúnine shaqyrady. Kenesary kóshesinen oryn tepken «Imperıal M» oıyn-saýyq ortaly­ǵyn­da týǵan kún keshin ótkizbek bolyp uıǵarǵan olar atalǵan ǵımarattyń aldyna kelip toqtaıdy. Jaldanǵan taksımen or­ta­lyqtyń janyna toqtap, aldymen oıyn-saýyq ortalyǵynda oryn barlyǵyn bilmekke Aıshanyń sińlisi Álııany jum­saıdy. Ishke kirip mán- jaıdy bilgen Álııa oryn bar ekenin aıtqan soń, kólikten túsip ǵımarattyń ishine kirgeni sol-aq eken aldynan kúzetshi kes-kestep zalǵa ótýge bolmaıtynyn aıtady. Jáne kúzetshiler jalǵyz emes olardyń janyndaǵy ákimshi– Vıktorııa Ýgert te olardy qoldaıdy. Vıktorııa Aleksandrovna «Bizde múgedekterge arnalyp jasalǵan jaǵdaı joq, tipten oryn da joq»,–dep bet baqtyrmaǵannan keıin ortalyqtyń meńgerý­shisi Marat Salıhovty shaqyrtady. Marat Ábishulyna buryn da osy ortalyqqa birneshe ret kelgenimizdi, árqashan mádenıetti túrde demalyp, kóńilimiz kóterilip qaı­taty­nyn aıtyp, ákimshiniń óreskel qylyǵy­nan arasha suradyq. Biraq bizden góri ákimshiniń sózin tyńdaǵandy jón kórgen ol esh shara qoldan­bady. Osylaısha jarty saǵat aıazda turyp, eńsemiz túsip úıimizge qaıttyq. Iá, biz múgedekpiz. Men jáne meniń qur­bym Danagúl Seıitbekova ekeýmiz qolarbaǵa tańylǵan janbyz. Bul syrtqy jaıymyz, al bizdiń janymyz múgedek emes, biz bireý­diń muńyna muń jabýdy óz basymyzǵa ar sanar edik. Al qol-aıaǵy balǵadaı jandar­dyń bizge osynshalyq álimjettik kórsetip, qorlaǵany nesi?!» – dep jazady adamgershilikti aıaqqa taptaǵan jandardan japa shekken Aısha Muqanova. Redaksııa «Imperıal M» oıyn-saýyq ortalyǵynyń basshysyna, onyń qyzmet­ker­lerine bizdiń elimizdiń «Múgedekterdiń quqyǵy jaıyndaǵy konvensııaǵa» qol qoı­ǵandyǵyn jáne elimizdiń zańy boıynsha bar­lyq kópshilik mekemelerinde, qoǵam­dyq oryn­d­arda múgedekterge arna­lyp jaǵ­daı jasaýdy (pandýstar) mindetteıtinin eske sa­la­dy. Adam quqyǵyn aıaqqa taptaýdan ımenbegen ortalyq qyzmetker­leriniń isine pro­ký­ra­týranyń da nazar aýdarǵanyn jón sanaımyz. Tipti, zańnan qoryqpaǵannyń ózinde erteńgi kúnnen úmiti bar adam «Qysastyq qııametke ketpeıdi», «Atańa ne qylsań, aldyńa sol keledi» degen halyq danaly­ǵyn da esinen shyǵarmaýy tıis. Búgin saýmyz, al erteńdi kim biledi? Oılanaıyq, aǵaıyn! Anar TО́LEÝHANQYZY.