Aıbattyń azamattyǵy

Bala qııalyna shek bar ma?  Qazir zińgitteı jigit bolǵandardyń barlyǵynyń da kishkentaı kezinde arman qushaǵynda terbetilgenin eshkim de joqqa shyǵara almasy anyq. Aıbat Kárimov te bala kezinen áskerı adam bolýdy jany qalaıtyn.  Mundaı oıdyń óz qııalyna qalaı qanat bitirgenin tap basyp aıta almaıdy. Áıteýir,  áskerı  adam  bolsam dep talpynǵany esinde. Sodan da bolar, Shubar­qudyqtaǵy orta mek­teptiń segizinshi synybyn bitirgen soń oblys ortalyǵyndaǵy Eset Batyr atyndaǵy polısııa mektebine túsip, ony jaqsy aıaqtaǵany. Ustazdar otbasynda tárbıelengen onyń mektepte de, polısııa mektep-ınternatynda da úlgili bolýy sol tárbıeniń arqasy deý oryndy. Bala bolyp, shálkes minez tanytpady desek, aqıqattan attaǵanymyz bolar edi. Ol da balalyq shaqtyń bal dáýrenin belinen keshti. Biraq, artyq qylyqtarǵa barǵan emes. – Men ózim ustazdar otbasynda óstim.  Otbasyndaǵy úsh balanyń kenjesimin. Ákem Sran da, marqum anam Kúlánda da muǵalimder. Men nege ekenin bilmeımin, áskerı adam bolýdy armandadym. Sol armanyma jettim de.  Mindetti áskerı boryshymdy Astanada ótkerdim,  2007 jyly osynda ornalasqan №6655 áskerı bólimge kelisimshartpen ju­mysqa turdym. Qazir osy áskerı bólimniń tyldaǵy jumystar jónindegi komendantymyn, – dedi ol. Onyń ómirindegi oqys oqıǵa 2009  jyldyń sáýir aıynda bolǵan edi. Qashanda jan-jaqtaǵy oqıǵalarǵa qa­ǵylezdikpen qaraıtyn Aıbat órtti birden ańǵardy. Ol órt tutanǵan «Anar» kafesi eke­nin de keıin estidi. Biraq, bir sátte oılanyp-tolǵanatyn ýaqyttyń joqtyǵyn sezingen ol qasyndaǵy sarbazdardy, oqys oqıǵaǵa tańǵalýshylardy keıin ysyryp, qaýipsizdik aımaǵyn qorǵady. Osyndaı uıymdastyrý jumysyn atqaryp júrgen ol, kafeniń ishinde qalǵan ıesin qutqarý­dyń qajettiligin túsindi. Sóıtti de  ol otqa oranǵan kafege kirip, tú­tinge tunshyqqan kafeniń qojaıynyn dalaǵa alyp shyqty.  Aıbattyń bul azamattyǵy aqtó­belikterge tez tarady. Sondyqtan da bolar, oǵan degen qalalyqtardyń yqylasy, nıeti erekshe. – Men, muny eshqandaı erlik dep esep­temeımin, azamattyq paryzym dep túsinemin. Meniń ornymdaǵy ár azamat osylaı isteıtinine kepildik beremin. Biz tatýlyq pen turaqtylyq irgetasy berik elde turyp ja­tyrmyz. Sondyqtan bir-birimizdi qıynshylyqtan qut­qarý azamattyq paryzym dep esepteımin, – deıdi ol. Osyndaı azamattyq qımyly úshin ol Ishki ister mınıstrliginiń «Qoǵamdyq tártipti qamtamasyz etýde úzdik shyqqany  úshin» me­dalimen marapattaldy. Mek­tepke baratyn Islamy men balabaqsha tárbıelenýshisi Inabatyn ózindeı azamat bolsa eken dep tileıdi. Kóńili qalaǵan kásibine qaltqysyz bolýǵa beıim jigit aldaǵy kúnderge úlken úmitpen qaraıdy. Otbasyndaǵy yntymaqty qalaıtyn talapty jastyń alar  asýy bıik bolaryna senimimiz mol. Satybaldy SÁÝIRBAI, «Egemen Qazaqstan»   Aqtóbe oblysy