Komandır týraly sóz

«Komandırdi taǵaıyndaý múmkin emes, komandır bolyp týý kerek» degen sóz bar. Bul – asyra sóılegendik emes, bul – shyndyq. Jaratqan mundaı qasıetti kez kelgenniń mańdaıyna jaza salmaǵan. Muny joǵary kásibılik, tolaıym tájirıbemen baılanystyra salý da azdyq etetindeı. Qubylystyń astarynda adam boıyndaǵy adaldyq pen ashyqtyq, ulysty úıirip alar ustamdylyq pen keń júrektilik jatsa kerek. Sondyqtan da kóshbasshynyń buıryǵyna kózsiz baǵynýdan góri, oǵan degen senim sezimi alǵa jetelep otyrady, jeńiske jetkizedi. Áskerdegi ákeń de, shesheń de sol. Dál osyndaı qasıetti janyna qondyra bilgender – komandır. Júregi Otan dep jalyndap turatyndardyń biri – Ulttyq gvardııanyń Kókshetaýdaǵy №5510 áskerı bóliminiń komandıri, podpolkovnık Janbolat Tólegenov. Ol 1978 jyldyń 14 naýryzynda Aqtóbe oblysynyń burynǵy Le­nın aýdanyndaǵy Qaıraqtysaı aýylynda, qarapaıym otbasynyń shańyraǵynda týǵan.  Eńbektiń maıyn jep, elge syıly atanǵan áke-sheshesi Janbolat pen onyń baýyrlaryna Otandy súıýdiń qaryz-paryzyn barynsha sińdirip ósirgeni kórinip tur. Janbolat О́tegenuly ózimen sóıleskenimizde, bul sezimder ómiriniń basty máni-maǵynasy ekenin aıtty. J.Tólegenov 1995 jyly orta mektepti bitirip, aýyl ishindegi jumysqa aralasty. Kelesi jy­ly mindetti áskerı qyzmetke sha­qyrylǵan. Azamattyq boryshyn Kókshetaýdaǵy №5510 áskerı bólimde ótedi. Mynany qarańyz, búgingi kúni ózi komandır bolyp otyrǵan áskerı bólim. Kezdeısoqtyq deýge qımaıtyndaı jaǵdaı. Dál osy bólimde qatardaǵy jaýyngerdiń ómirindegi betburysty kezeń bastalǵany anyq. Jas adam­nyń boıyndaǵy burynnan bar qasıetterdi terbetip, «sen áskerı adamsyń» degen sezimdi oıatyp, senimine serpilis qosqan bul bólim tegin bolmaǵany. Mindetin ótep, óziniń qasıetti Qaıraqtysaıyna kelgen ol ákesi­niń batasyn alyp, kóp uzamaı Petropavlǵa attandy. Mazdaǵan maqsat, áskerı bólimniń minezdemesi de sep bolǵandaı, ol osyndaǵy Qazaqstan Respýblıkasy IIM Ishki áskerleriniń Áskerı ýchılıshesine kýrsant bolyp qabyldandy. Oqý ornyn 2001 jyly úzdik bitirgen J.Tólegenov elimizdiń ártúrli aımaǵyndaǵy áskerı bólimderde vzvod komandırinen áskerı bólim komandırine deıingi qyzmet satylarynan ótti. Áskerı ómirdiń ońaı emes­tigi belgili. Janbolattyń tózim­diligi, qaraýyndaǵy soldattar men ofıserlerdiń jan-júregin túısine bilýi, qatal da bolsa ádil sheshim qabyldaı alýy, qoıylǵan mindetterdi minsiz atqarýǵa ju­myl­­dyrýy abyroı aýylyn jaqyn­datqany anyq. Mundaı jigitterdiń maqsaty da bıik bolady. Sonyń bir aıǵaǵy – 2010 jyly Ulttyq qorǵanys ýnıversıtetin támamdaýy der edik. Podpolkovnık Janbolat О́te­gen­ulynyń basshylyǵyndaǵy №5510 áskerı bólim kókshetaý­lyqtardyń kóz aldynda eleýli ózgeriske túskenin ekiniń biri aı­tady. Onyń ishki aýlasy men kazar­masyndaǵy jaǵdaıdyń qandaı ekendigin bólimniń aınalasyndaǵy muntazdaı tazalyqtan, jaıqalyp ósip kele jatqan balaýsa aǵash­tardan, kóshede kezdese qalǵan ofı­serler men soldattardyń izettiliginen de baıqaýǵa bolady. Burnaǵy jyly áskerı bólimge Túrik jandarmerııasynyń joǵary laýazymdy qyzmetkerleri tájirıbe almasý maqsatymen kelgeni, jaqsy lebizder bildirgeni esimizde. Muny elimizge kórsetilgen qurmet dep qabyldaǵanymyz jón. Baqbergen AMALBEK, «Egemen Qazaqstan» Aqmola oblysy