«Shevron» – mańyzdy seriktes

Memleket basshysy Nursultan Nazarbaev «Shevron» kompanııasy dırektorlar keńesiniń tóraǵasy jáne bas atqarýshy dırektory Djon Ýotsonmen kezdesti, dep habarlady Prezıdenttiń baspasóz qyzmeti. Kezdesý barysynda Qazaqstan men «Shevron» kompanııasynyń munaı jáne gaz salasyndaǵy yntymaqtastyǵy, birlesken jobalardy júzege asyrý, sondaı-aq, korporasııanyń kenishti ıge­rýge qatysý aıasyn keńeıtý máse­leleri talqylandy. Elbasy Qazaqstan úshin «Shev­ronnyń» mańyzdy seriktes ekenin atap ótti. – Biz etene jaqyn dostarmyz. Yntymaqtastyǵymyz ózara tıimdi. Sizdiń kompanııany biz basqa merdigerlerge úlgi etemiz. Qazir kúrdeli kezeńdi bastan ótkerip jatyrmyz. Buryn shıkizat baǵasy tym joǵary bolǵandyqtan shalqyp ómir súrdik. Búginde baǵa áldeqaıda kóńilge qonymdy. Sondyqtan, bizge jańa baǵamen jáne úlken óndiris kólemimen ómir súrip úırený kerek, – dedi Nursultan Nazarbaev. Qazaqstan Prezıdenti «Shev­ron» kom­panııasynyń elimiz­de qyzmet jasaǵaly beri bıýd­jet­ke 113 mıllıard dollar tóle­genine, sondaı-aq áleý­mettik ın­fraqurylymdy jaqsar­týǵa baǵyt­talǵan birqatar aý­qym­dy jobalardy júzege asy- ryp jatqanyna nazar aýdardy. – «Teńizshevroıl» qyzmet­kerleriniń 85%-y – qazaqstan­dyqtar, barlyq býyn basshy­lary­nyń 73%-y – elimizdiń aza­mattary. Bul – basqa ınvestorlar úshin jaqsy ónege, – dedi Mem­leket basshysy. Dj.Ýotson óz sózinde eldegi qolaıly ınvestısııalyq ahýalǵa qoldaý kórsetkeni jáne salany damytýǵa kóńil bólip otyrǵany úshin Nursultan Nazarbaevqa alǵys aıtty. – Men qorshaǵan ortany qor­ǵaý jáne óndiristegi qaýipsizdik máselelerine Sizdiń zor kóńil bóletinińizdi bilemin. Bizdiń kásiporyn osy kórsetkishter boıynsha álemdegi úzdikterdiń biri. Bıyl biz Teńiz kenishinde kúrdeli jóndeý júrgizemiz, odan keıin kúkirt qaldyǵy qorshaǵan ortaǵa taralmaıtyn bolady, – dedi «Shevron» kompanııasynyń basshysy. Dj.Ýotson qazaqstandyq ónim úlesin ulǵaıtý kompanııa qyzmetiniń basymdyǵy bar baǵyty bolyp qala beretinin, qazirgi kezde onyń kólemi 20 mıllıard dollar bolyp otyrǵanyn aıtty.