ASTANA. 7 mamyr. Belgili qazaqstandyq kompozıtor, gıtarashy, «Mıýzıkola» tobynyń aranjırleýshisi, «A’Stýdıo» tobynyń burynǵy múshesi Bolat Syzdyqov qaıtys boldy. Bul týraly tengrinews.kz-ke silteme jasaǵan egemen.kz tilshisi habarlady.
«Ol jaıdary minezdi, meıirimdi adam bolatyn. Ekeýimiz uzaq jyldardan beri aralasyp keldik. Marqum Batyrhan Shúkenovtiń qaıtys bolǵanynan keıin araǵa bir jyl salyp, ómirden ótkeni bizge aýyr soǵyp otyr. Osydan bir aı buryn ǵana demalysqa baryp kelgen edi. Alǵa qoıǵan maqsattary kóp bolatyn. Konsert qoımaq bolyp josparlaǵan. Shynymdy aıtsam, onyń qazasyna áli de sene almaı otyrmyn. Aty ańyzǵa aınalǵan uly tulǵalardyń biri», – dedi kúıshi Asylbek Eńsepov.
Bolat Syzdyqov 1956 jyly 21 maýsymda Qaraǵandy qalasynda týǵan. Tanymal oqytýshy Aleksandr Majelıannyń djaz gıtarasy kýrsyn bitirgen. Osy qalada 16 jasynda fılarmonııaǵa jeke án oryndaýshysy bolyp qabyldandy. Sondaı-aq, «Gákký» ansambliniń quramymen gastroldik saparlarda bolǵan.
Ol Respýblıkalyq «Gúlder» jastar ansambliniń arnaıy shaqyrtýymen Almatyǵa kelgen. Ánshi Roza Rymbaeva óner kórsetken «Araı» tobynyń gıtarısi boldy. Bul top atalǵan ánshiden bólingennen keıin «Alma-Ata» ataýymen jańa top qurady. Olardyń arasynda Bolat ta bolǵan. Ásirese, Máskeýde tanymal bolǵan toptyń ataýy keıinnen «A’Stýdıo» bolyp ózgerdi.
Kompozıtor 1992 jyly óziniń jeke mýzykalyq jobasyn ashpaq boldy. Ánshi Karına Abdýllınamen tanysyp, «Mıýzıkola» tobyn qurdy. Qazaqstan Prezıdentiniń jarlyǵymen 2012 jyldyń 5 jeltoqsanynda oǵan Eńbek sińirgen óner qaıratkeri ataǵy berildi.
Aıan Ábdýálı.
Derek: tengrinews.kz.
Foto: comode.kz.
