Oqyrman
Ardagerler keńesi qarjylandyrylsa
Aıtaıyn degenimiz, qandaı bir dúbirli merekelik is-sharalaryn ótkizý barysynda qarjyǵa tireletin máselelerde barlyq deńgeıdegi ardagerler keńesteri qaltalylar men isker azamattardyń qoldaýyna jaltaqtap qaraýmen, solardan dámetýmen bolady. Bes saýsaq birdeı emestigindeı, kómegin usyna qoısa jaqsy ǵoı. Áıtpese únemi alaqan jaıa berýdiń ózi qadirdi qashyrmaı ma? Osy jaǵyn eskere kelip, respýblıkalyq Ardagerler keńesine usynys jasaǵaly otyrmyz. Jergilikti ardagerler keńesterin bıýdjetten qarjylandyrýdyń retin tabýǵa bolmas pa eken? Shaǵyn shtat bekitip, azdap qarjy kólemin anyqtap degendeı. Jasyratyny joq, keıbir jergilikti ardagerler uıymdary óz kúshterimen ofıs jaldap ta jumys isteıdi. Biraq bul ońaılyqqa túspeıtinin uǵynamyz. Qaıtkende de joǵary organdar aralasyp, bir ońtaıly jolyn qarastyrsa degen úmitimiz bar. О́z kezeginde ardagerler uıymdary Táýelsiz elimizdiń órkendep, qýattanýy turǵysynda óz úlesterin qosyp júrgenin kóptegen jarqyn mysaldardan ańǵarýǵa ábden bolady. N. DÁÝLETOV, Saryaǵash aýdandyq ardagerler keńesiniń hatshysy, B. ShIRINBEKOV, Saryaǵash qalalyq ardagerler keńesiniń hatshysy. Ońtústik Qazaqstan oblysy.... talap etedi
Adal tabysym rásýa boldy
Men ekinshi toptaǵy múgedekpin. 40 jyl úzilissiz eńbek etip, eń tómengi zeınetaqy rásimdeldi. Odan múgedektikke beretin járdemaqy kóterińki bolyp, sony qanaǵat tutyp júrmin. Jıǵan-tergenimdi «Valıýt-Tranzıt» bankine salyp otyrǵan edim. Ol bankiniń jaıy belgili. Basqarýshylary temir torǵa toǵytylyp, bank jabylyp tyndy. Sonyń esebinde azyn-aýlaq ósim aqsham qalǵan edi. Sony áne-mine beremiz dep, saǵyzsha sozyp keledi. Bulaı san soǵyp qalǵan jalǵyz men emes, myńdap sanalady. Talaı ótinish qaǵaz jazyp, joǵaryǵa jónelttik. Esh qaıran joq. Mysymyz qurydy. Jetpisten asqan adamǵa tynyshtyq kerek. Telmirip, qur úmitpen júrýdiń ózi aýyr soqqy biz úshin. Ádildik qashan ústemdik quratyn bolady? Osy tilegim jeter me eken, tıisti orynǵa. Joqtap otyrǵanym – mańdaıaqymnyń ótemi. Kúnkóristiń qıyndyǵynan qolyma eriksiz qalam aldym. Úmittimiz! Rahymjan BО́LEKBAEV, 2- toptaǵy múgedek. Taraz.... pikirin bólisedi
Qyryqtaǵy adam kári me?
Jasyratyny joq, qoǵamymyzda jumyssyzdyq bar. Onymen kúres joǵary bılik tarapynan júıeli júrgizilip kele jatqanynan da habardarmyz. Biraq bir demde bárine jumys úlestire qoıýdyń da qısyny kelmeıtinin túsinemiz. Osyndaıda jastar jaǵynyń selteńbaıǵa salynýy qınaıdy. Mamandyǵyna saı jumys tabý ońaı emes. Al jasy egde tartqandardyń jaıy tipti asqynyp tur. Egde deımin-aý, kádimgi qyryqtaǵy qylshyldaǵan jigitińniń ózin «kárisiń» dep, jumysqa qabyldarda keýdeden ıtergenin estip júrmiz. Durys pa, osy? Sonda jumysqa 20-30-daǵylar ǵana qabyldanar bolsa, basqalary ne isteý kerek? Naǵyz aqyl toqtatyp, tájirıbesi baıyǵan kezde qajetsiz bolyp qalýdan ótken soqqy bola qoımas, sirá? Elbasynyń ózi bir sózinde, zeınet jasyna kelgenderdiń densaýlyǵy myqty bolyp, iskerlik qabileti tómendemegen jaǵdaıda, jumysyn jalǵastyra bergeni abzal dep aıtyp qalǵanyn óz qulaǵymyzben estigenbiz. Endeshe osy oıdy eskereıik. Taǵy bir aıtarym, bastyq ózgere qalsa, sol orynǵa kelýshi komandasymen saý ete qalady. Sodan burynǵylardy sebepti-sebepsiz qysqartý bastalady. О́z ertpesin tyǵý kerek qoı... Osy keleńsizdikti tyıǵan jón bolar edi. Erkin DÁÝEShULY, zeınetker. Astana.
