QOSTANAI. 10 mamyr. Sonaý Eýropadaǵy Slovakııadadan «Egemenniń» tilshiler qosynyna habar keldi. Bratıslava qalasyndaǵy Iа.Komenskıı atyndaǵy ýnıversıtette biliktiligin kóterý kýrsynda oqyp jatqan A.Baıtursynov atyndaǵy Qostanaı memlekettik ýnıversıteti shet tilder kafedrasynyń dosenti, fılologııa ǵylymdarynyń kandıdaty Meńzada Samembet Jeńis kúni baýyrlastar zıratyna baryp, qazaq jaýyngerleriniń basyna gúl shoqtaryn qoıypty. Ustaz bul jóninde «Egemenniń» oqyrmandaryna jetkizýimizdi ótinipti. Bul týraly egemen.kz tilshisi habarlady.
Meńzada Sámembet redaksııaǵa Bratıslava qalasyndaǵy baýyrlastar zıratynda túsirgen sýretterin qosa jiberipti. Ol aralap júrip, aldymen kishi leıtenant K.A. Akımbekov degen jaýyngerge qoıylǵan eskertkish tasty tabady. Onan keıin taǵy da leıtenant Nuralym Sybankýlov jáne Ábishuly Seıtjan degen eki jaýyngerge qoıylǵan belgini taýyp, olardyń basyna gúl shoqtaryn qoıypty. Belgi tasta úsheýiniń de 1945 jyly qaza bolǵany jazylǵan. Ábishuly Seıtjan urpaqtarynyń atasynyń basyna baryp, belgi qoıǵany kórinip tur.
Meńzada Sámembet: «Men merekeden buryn ózim barǵanda K.A.Akımbekov degen leıtenanttyń basyna qoıǵan kórip, gúl qoıyp ketkenmin. Odan keıin 9 mamyr kúni baýyrlastar zıraty kesheninde qala basshylyǵy ótkizgen merekelik saltanatqa qatystym. Sol jerde jerlengen taǵy da eki jaýyngerdi taýyp aldym. Baýyrlastar zıraty keshenin aralap júrip, Mıloslava degen jergilikti slovak áıelmen tanystym. Ol kisi Akımbekovtyń zıratyna kelip, gúl qoıyp, kútip ketedi eken. Bul zıratqa jyl saıyn Reseıden, Qazaqstannan, taǵy basqa elderden osynda jatqan jaýyngerlerdiń týystary kelip, taǵzym etip, tasyn jańartyp qoıyp ketedi. Mıloslavanyń aıtýynsha, Akımbekovty (Ákimbekov bolar) izdep kelgen eshkim bolmapty. О́zi de shetkerirek, buryshta jatyr. Leıtenanttyń óte qyrshyn jasynda, 25 jasta qaza tapqanyn onyń kórshileri aıtypty. Olar Ákimbekovtyń beıitin kútip, gúl qoıyp júripti, qonys aýdarǵanda bul qaıyrymdy isin Mıloslavaǵa tapsyryp ketipti», – dedi.
Meńzadanyń aıtýynsha, orys tilinde táp-táýir sóıleıtin Mıloslava «Ákimbekovtyń týǵan-týystaryna Qazaqstanǵa barǵanda sálem aıtarsyz» degen ótinishin de aıtypty. Qazaq jaýyngeriniń beıitin kútip júrgen slovak áıeliniń ımandy isi árkimniń júregin tolqytqandaı edi. Beıtshilik úshin qan tókken jaýyngerler rýhy, erlik dańqy óshpeıdi.
Názıra Járimbetova.
Derek, foto: egemen.kz.
