Qurylys • 10 Tamyz, 2025

Qumyrsqanyń ıleýinen qurylys nysanyna deıin

Áńgimeni álimsaqtan bastasaq, adam záýzaty tabıǵat tylsymyn uǵyp, shıki asty qunarǵa, qur tasty quralǵa aınaldyrýdy úırengen sátten bastap, ózine jaıly meken jasaýǵa beıimdele berdi. Qumyrsqanyń ıleý qazyp,  qarlyǵyshtyń uıa salǵanyn kórgen arǵy násilimiz baspana mańyzyn uǵyna tústi.Tarıh tamyryna úńilsek, Afrıkadaǵy Oldýveı shatqalynda adamdar lava kesekterinen tegis alań jasap, alǵashqy qurylys áreketin osydan 1 mln 750 myń jyl buryn júzege asyrǵan kórinedi. Al qazirgi qazaq dalasyndaǵy alǵashqy qurylys ta tym erte, bizdiń zamanymyzdan úsh myń jyl buryn Botaı qonysynda bastalǵan. Osy ýaqytta babalarymyz jylqyny qolǵa úıretip, balshyq pen aǵashtan jasalǵan úılerdi turǵyzyp úlgergen. Dáýir dońǵalaǵy aınalyp, jańa zamanǵa jetkizgen qazirgi kúnde de elimizdegi qurylys qarqyny báseńdegen emes. Qala jańaryp, aýyl túlep, ınfraqurylym keńeıip jatqan tusta bul salanyń júgin arqalap júrgen mamandardyń eńbegi eren.