G.Belger
Ádebıet • 12 Mamyr, 2021
Formasııalyq damý úlgisi ǵana emes, minez-qulyqtary da bir-birine uqsamaıtyn halyqtardyń arasyn jaqyndata túskeni úshin adam balasy eń aldymen ádebıetke qaryzdar. Sóz óneri qııalymyz týǵyzǵan myna fánıdiń jalǵan kórinisi ekenine qaramastan, ol bizge kúrmeýi kúrdeli tirshiliktiń tereńinde jasyrynǵan qundylyqtardy tabýǵa kómektesip keledi. Násildik, dinı-ǵuryptyq aıyrmashylyǵymyzǵa, qaı jerde, (meıli ol saharanyń shóli me, álde, teńizdiń kók maısa jaǵalaýy ma, nemese tipti sheksizdigi saǵymdy da adastyratyn keń baıtaq dala ma) týyp, peshenemizge qandaı ulttyń ókili bolý taǵdyry jazylǵanyna qaramastan ádebıet bárimizdi muńaıtatyn, qýantatyn, tabystyratyn, tańǵaldyratyn, biriktiretin, aıaýshylyǵymyzdy oıatyp, baýyrmashyldyq sezimimizdi arttyra túsetin, aqylmen túsindirip bere almaıtyn, bizdiń sanamyzdan da bıik turǵan – Qudaıdyń qupııasy.
