Pikir • 31 Qazan, 2021

Sezimi aqyn, júregi batyr ǵulama ǵalym

Akademık Edil Erǵojaulynyń týǵanyna – 80 jyl Edil Erǵojauly Erǵojın 1941 jyly 7 qarashada Almaty oblysy Eskeldi aýdany Ekpindi aýylynda dúnıege kelgen. 1963 jyly S.M.Kırov atyndaǵy Qazaq memlekettik ýnıversıtetiniń hımııa fakýltetin úzdik bitirdi. 33 jasynda «Jańa ıonalmastyrǵysh jáne totyǵý-totyqsyzdaný polımerleriniń sıntezi jáne túzilý zańdylyqtaryn zertteý» taqyrybynda doktorlyq dıssertasııasyn qorǵady. Qazaq KSR ǴA Hımııa ǵylymdary ınstıtýty Ionalmastyrǵysh sháıirleri zerthanasynyń meńgerýshisi, S.M.Kırov atyndaǵy Qazaq memlekettik ýnıversıteti Hımııa fakýltetiniń Joǵary molekýlalyq qosylystar hımııasy kafedrasynyń meńgerýshisi, dekany, atalǵan ýnıversıtettiń birinshi prorektory jáne rektory, «A.B.Bekturov atyndaǵy Hımııa ǵylymdary ınstıtýty» AQ dırektory, bas dırektory jáne Ionalmastyrǵysh sháıirler jáne membranalary zerthanasynyń meńgerýshisi, UǴA vıse-prezıdenti (1994-1995), Bilim jáne ǵylym vıse-mınıstri (1999-2002) bolyp jumys istedi. UǴA akademıgi E.E.Erǵojın «Ǵylym týraly» Qazaqstan Respýblıkasynyń zańyn, Qazaqstan Respýblıkasynyń Ǵylymı jáne ǵylymı-tehnıkalyq saıasatynyń tujyrymdamasyn jáne «Ǵylym» memlekettik baǵdarlamasyn ázirleýshi jumys tobyn basqardy.