Hemıngýeı
Ádebıet • 05 Jeltoqsan, 2021
Onyń appaq saqaly Santa Klaýstyń saqalyna uqsaıdy. Ol Dúnıejúzilik eki birdeı uly soǵysty kórip, qan maıdanda qalam ustaǵan jazýshy. Shyǵarmasyn keıde saý, keıde mas kúıinde jazdy. Biraq birde-bir týyndysynda oqyrmanyn jalyqtyrǵan emes. Qalam men qarýdy serik etken ol Tanzanııada ańshylyqqa shyǵyp, múıiztumsyqtardy aýlady. Bylǵary qolǵap kıip, boks ónerimen aınalysty. Taǵdyr ony birneshe ushaq apatynan aman alyp qaldy. Eń mańyzdysy, ol ólmes shyǵarmalar jazyp, adamzat tarıhyndaǵy eń keremet jazýshyǵa aınaldy. Onyń aty – Ernest Hemıngýeı. Onyń tarpań taǵdyry ártúrli qıyndyqtarǵa moıymaı, sony jeńýmen kúrese aldy. Bir sózben aıtqanda, Ernesttiń qalamy onyń óziniń minezi sııaqty tentek, oıy ol kezgen ulan-ǵaıyr alqapqa uqsas ushy-qıyrsyz boldy.
