«Evrovıdenıe» bas júldesin jeńip aldy
Shvesııanyń astanasy – Stokgolm qalasynda márege jetken «Evrovıdenıe» án konkýrsynda ýkraınalyq qyrym tatarynyń qyzy, lırıka-dramalyq soprano daýysty opera jáne djaz ánshisi Jamala bas báıgeni jeńip aldy. Ol fınalda qyrymdyqtar deportasııasyna arnalǵan «1944» degen ándi oryndady.
Jamalanyń shyn aty-jóni – Sýsana Alımqyzy Jamaldınova. Shamasy, laqap atty da osy teginen alsa kerek. Ol 1983 jylǵy 27 tamyzda Qyrǵyzstannyń Osh qalasynda týǵan. Keıinirek ata-anasy Qyrymǵa kóshedi. Jas qyzdyń balalyq shaǵy Alýshta túbindegi Malorechenskoe selosynda ótedi. Áke-sheshesi – mýzykanttar. Anasy keremet án salady jáne mýzykalyq mektepte muǵalim bolyp jumys jasaıdy. Ákesi – dırıjer. Olar bolashaq ánshini kishkentaıynan mýzykaǵa daıyndaǵan. Sýsana men onyń sińlisi qatań musylman tárbıesinde tálim alǵan.
Qyzdyń óte jaqsy daýysy bar ekeni úsh jasynda baıqalǵan. Talantty búldirshin toǵyz jasynda balalarǵa arnalǵan ánderi albomyn jazdyrǵan. Alýshtadaǵy mýzykalyq mektepte bilim alǵan. Keıin Sımferopoldaǵy mýzyka ýchılıshesinde oqyp, opera vokalyna mamandanady. Keıin Kıevte Ulttyq mýzyka akademııasyn bitiredi.
Sýsana oqyp júrgen kezinen túrli halyqaralyq festıvaldar men konkýrstarǵa qatysa bastaıdy. Sonyń biri – «Qyrym kóktemi» konkýrsynda úshinshi oryn alady. Sonda «Dodj-2001» arnaıy syılyǵyna da ıe bolady. Budan keıin belgili saksofonshy Aleksandr Novoselskııdiń súıemeldeýimen Máskeýde ótken halyqaralyq konkýrsqa qatysady. Budan bólek, Italııada laýreat atanady.
«Egemen-aqparat»