Aýyl sharýashylyǵy ekonomıkanyń mańyzdy salasy bolǵandyqtan, Elbasy bul baǵytty damytý máselesine jiti mán berip keledi. Osy rette aǵymdaǵy jyldyń alǵashqy toqsanyndaǵy qorytyndylar boıynsha, aýylsharýashylyq óniminiń kólemi ótken jylmen salystyrǵanda 2,9 %-ǵa ósti.
Bul jóninde Prezıdent janyndaǵy Ortalyq kommýnıkasııalar qyzmetinde ótken baspasóz máslıhatynda Aýyl sharýashylyǵy vıse-mınıstri Gúlmıra Isaeva málim etti. Mal sharýashylyǵy jáne ósimdik sharýashylyǵyn damytý máseleleri boıynsha BAQ ókilderimen ótken kezdesýde vıse-mınıstr birqatar derekterdi alǵa tartty. Onyń aıtýyna qaraǵanda, bıylǵy jyldyń alǵashqy toqsanyndaǵy esep boıynsha – aýyl sharýashylyǵy óniminiń kólemi 317,8 mlrd.teńgeni qurady. Mal sharýashylyq ónimderiniń kólemi 3%-ǵa artyp, 303,6 mlrd.teńge paıda kelgen. Azyq-túlik óndirisiniń kólemi 283,5 mlrd.teńgege nemese 4%-ǵa ulǵaıǵan. Mal sharýashylyǵynda ettiń barlyq túrin óndirý kólemi boıynsha bıylǵy jyly ótken jyldyń sáıkes kezeńimen salystyrǵanda 4,4% óskendigi baıqalady. Bul rette sút ónimderi – 3%, al jumyrtqa óniminiń kólemi 10, 2% ósken.
Sonymen qatar, aýyl sharýashylyǵynyń negizgi kapıtalyna tartylǵan ınvestısııa kólemi 21,1 %-ǵa ulǵaıyp, jalpy somasy 25,5 mlrd.teńgeni qurady. Qazirgi tańda elimizdiń ońtústik, batys jáne shyǵys óńirlerinde kóktemgi egis jumystary júrip jatyr. Onyń ishinde 963,4 myń gektarǵa dándi daqyldar, 586,1 myń gektarǵa maıly daqyldar jáne kópjyldyq shópter 190,8 myń gektarǵa egilse, kókónis-baqsha daqyldary 160,2 myń gektar alqapqa sebilgen.
Sondaı-aq, «IQM etiniń eksporttyq áleýetin damytý» jobasyn iske asyrý jalǵasýda. Ústimizdegi jyldyń birinshi toqsanynda «Sybaǵa» baǵdarlamasy aıasynda 10 myń iri qara mal basy satyp alynǵan. 773 myń iri qara mal basyn qamtýǵa 11 myń sharýashylyq qatysady. 1,8 mln.gektar jaıylymdyq jerlerdi aınalymǵa salý úshin qazirgi tańda 848 qudyq salynyp jatyr. Jáne de bıylǵy jyly aýylsharýashylyq daqyldary 21,6 mln.ga alqapty qurap otyr. Onyń ishinde 15,2 mln.gektary dándi daqyldarǵa, al 1,9 mln.ga maıly daqyldarǵa arnalǵan bolsa, qalǵany malazyqtyq daqyldar men kókónis-baqsha jáne kartop daqyldaryn egetin alqaptar.
Elmıra MÁTIBAEVA,
«Egemen Qazaqstan»