«Damý» qory shaǵyn jáne orta kásipkerlikti qoldaýdyń jańa baǵdarlamalaryn engizedi. Bul jaıynda keshe Prezıdent janyndaǵy Ortalyq kommýnıkasııalar qyzmetinde ótken baspasóz máslıhatynda aıtyldy.
Baspasóz máslıhaty «Damý» qory qyzmeti aıasynda shaǵyn jáne orta bıznesti qoldaýdyń jańa quraldary» taqyrybyna arnaldy. Ol baǵdarlamalardyń oryndalý barysy jaıynda «Damý» kásipkerlikti damytý qory» AQ basqarmasynyń tóraǵasy Qýanysh Tileýshın baıandady.
«Damý» qory bızneske qarjylaı jáne qarjylaı emes qoldaý kórsetýmen aınalysady. Qarjylaı kómek kórsetý aıasynda bizde birqatar qoldaý quraly bar. Bul salada osy jyldyń 4 aıynda byltyrǵy jylǵy sáıkes kezeńmen salystyrǵanda 35,7 paıyzǵa ósim baıqalady. Jobalarǵa kómek kórsetýge kelsek, biz 1140 jobaǵa 79,9 mlrd. teńge nesıe túrinde qoldaý kórsettik. Al qoldaý kórsetýdiń ekinshi baǵyty – syıaqy mólsherlemesin sýbsıdııalaý baǵdarlamasy aıasynda bizde 29,4 paıyz ósim bar. Biz 550 jobaǵa qoldaý kórsettik. Al byltyrǵy jyldyń sáıkes kezeńinde 425 jobaǵa qoldaý kórsetilgen bolatyn», dedi Q.Tileýshın.
Málimetke súıensek, ótken jyly «Damý» qorynyń qoldaýyn kórgen kásipkerler 2,1 trln. teńgeniń ónimin shyǵarǵan. Al qordyń qoldaýyn kórgen kásipkerler 160 mlrd. teńge salyq tólegen, 25,9 myń jumys ornyn qamtyǵan.
«Damý» qory kásipkerlikti qoldaý maqsatynda qazirgi tańda birneshe baǵdarlamany qolǵa alyp otyr. Máselen, kásipkerlerge nesıe alý úshin bankte jyldam ótinim toltyrýǵa kómektesetin jańa tehnologııa – «Damý Blıs» dep atalatyn joba iske qosyldy. Sondaı-aq, «Damý» qory nesıege kepildeme berýdi «E-gov» portaly arqyly avtomattandyrý júıesin iske qosty. Buǵan qosa, «Shaǵyn qarjylyq uıymdar arqyly qarjylandyrý» baǵdarlamasyn atap ótýge bolady. Jedeldigi men deńgeılerine qaraı ári jekelep qolǵa alatyndyqtan mıkroqarjylyq uıymdar «Damý» qory arqyly mıkro jáne shaǵyn, ásirese, aýyldyq jerlerdegi kásiporyndardy nesıelendire alady. Sebebi, aýyldyq jerler men aýdandardaǵy kásipkerler bank nesıelerine qol jetkize almaıdy. Olar úshin bul baǵdarlama qosymsha qarjylandyrý kózi boldy. Al endi «Franshızany qarjylandyrý» jańa baǵdarlamasy kásipkerge daıyn bıznes sheshim alýǵa múmkindik beredi. Sondaı-aq, «Faktorıng» quralyn paıdalanatyn jańa baǵdarlama kásipkerdiń aınalymynda únemi aqsha bolýyn qamtamasyz etedi. Bıyldan bastap ekonomıkanyń basymdyq berilgen salalarynda qyzmet etetin óndirýshiler aınalymdaǵy qarajatyn toltyrý úshin bankten alǵan nesıeleri 19 paıyzdyq mólsherlemede bolsa da sýbsıdııalanatyn bolady. Bul qarjy kásipkerlerdiń boryshtaryn jeńildetýge baǵyttalǵan. Taǵy bir toqtalatyny – «Damý-Optıma». Bul «BJK-2020» baǵdarlamasy boıynsha salalyq maqsat aıasyna kirmeıtin kásipkerlerge kepilzat jetpegen jaǵdaıda «Damý» qorynyń kepildemesin paıdalana otyryp, bankten nesıe alǵa múmkindik beredi.
Dınara BITIKOVA,
«Egemen Qazaqstan»