Mınsk qalasyndaǵy Belorýssııa memlekettik mádenıet jáne óner ýnıversıtetinde «Folklor: tanym, qabyldaý, saqtaý problemalary» taqyrybynda halyqaralyq ǵylymı konferensııa ótti.
Besinshi ret shaqyrylǵan forýmǵa Belorýssııa, Qazaqstan, Reseı, Polsha, Lıtva memleketteriniń ókilderi qatysty. Qazaqstan atynan Aqmola oblystyq fılarmonııasynyń «Aınakól» folklorlyq ansambli etnografııalyq mádenıetti saqtaý, zertteý jáne qabyldaý máselelerine qatysty atqarylyp jatqan istermen tanystyrý qurmetine ıe boldy. Ansambl jetekshisi Rýslan Qoıshybaev óz baıandamasynda qazaq folklorynyń rýhanı mańyzy jaıynda áńgimelep, ulttyq mýzyka aspaptarynyń ereksheligin taldap kórsetti.
Gala-konsertte qazaq kompozıtorlarynyń eń úzdik shyǵarmalary oryndalyp, darqan dalamyzdyń, qazaq jeriniń júrek soǵysy estilip turdy. Jurtshylyq, ásirese, Abylaı hannyń «Qara jorǵa», Aqan seriniń «Balqadısha», E.Úsenovtiń «Syrly Kókshe» shyǵarmalaryna aıryqsha qurmet kórsetti.
Etnoaýyldaǵy kórmede qazaq óneri men kóne mýzykalyq aspaptaryna den qoıýshylar kóp boldy.
Baqbergen AMALBEK,
«Egemen Qazaqstan»
Aqmola oblysy