Mánshúk Mámetovanyń pýlemeti

týǵan jeri – Oral qalasyna jetkizildi Batys Qazaqstan oblystyq M.Mámetova atyndaǵy memorıaldyq mýzeıdiń qyzmetkerleri Shyǵystyń eki shynarynyń biri – Keńes Odaǵynyń Batyry Mánshúk Mámetovanyń sońǵy demi taýsylyp, máńgilikke damyldap qalǵan Nevel jerinen úlken oljamen oraldy. Olar qaharman qyzdyń, batyr jerlesteriniń jaýdy josadaı qyrǵan dańqty pýlemetin sol jaqtan arqalap ákeldi. Bul bastamashyl topty keremet entýzıast, mýzeıdiń basshysy Svetlana Bektenovanyń ózi bastap barǵan. Kópten be­ri Uly Otan soǵysy týraly ma­terıaldar jınaqtap, ony tú­birleı zerttep kele jat­qan ol osy sapar Mánshúktiń pý­le­met bólshekterin qýana-qýa­na alyp jetken. Batyr týǵan topyraqqa jetkizilgen qa­rýdyń uń­ǵysy men qal­qany men bas­qa da usaq-túıek ból­shekteri jaqsy saqtalypty. – Erlik­pen qaza tap­qan qaısar qyzdyń kóp zaty qazir mýzeıde tur. Biraq bul jolǵy jádigerdiń jóni bólek, – deı­di mýzeı mamandary. – Bizdiń mýzeıimiz úshin bul orasan zor máni bar úlken jańalyq bolyp otyr. Shyn máninde sensasııa osyndaı-aq bolar. Mánshúk mýzeıine Mánshúktiń pýlemeti keldi. Budan artyq ne kerek. Úsh uıyqtasaq túsimizge kirmegen bul oqıǵa jurttyń bárin keremet serpiltti. Biz batyrdyń jan serigi bolǵan qasıetti qarýyn Nevel qalasynan taptyq. Osynda arnaıy kezdesken «Gvozdıka» patrıottyq jasaǵy ony qolymyzǵa berdi. Men óte rızamyn, – dedi Svetlana Bektenova. Temir QUSAIYN, «Egemen Qazaqstan» ORAL