Jaqynda Máskeý qalasynyń Kıno úıinde Qazaqstan Respýblıkasy Tuńǵysh Prezıdentiniń ómir joly týraly baıandaıtyn «Kóshbasshy joly» kınoepopeıasynyń besinshi bólimi bolyp tabylatyn Sergeı Snejkınniń «Juldyzdar toǵysqanda» kórkem fılminiń tusaýkeseri ótti. Jańa kınotýyndynyń alǵashqy reseılik kórermenderiniń arasynda tanymal saıasatkerler, qoǵam qaıratkerleri, mádenıet jáne óner salasynyń ókilderi, Reseı kınosynyń sheberleri, joǵary oqý oryndarynyń oqytýshylary jáne stýdentteri, sonyń ishinde qazaqstandyq stýdentter boldy.
Fılm tusaýkeseri aldynda túsirý toby, Qazaqstan Respýblıkasy Mádenıet jáne sport mınıstri Arystanbek Muhamedıuly, Reseı kınematografıster odaǵynyń tóraǵasy Nıkıta Mıhalkov, fılm rejısseri Sergeı Snejkın, prodıýser Vıacheslav Telnov, akterler Berik Aıtjanov, Igor Ýgolnıkov jáne basqalardyń qatysýymen baspasóz máslıhaty ótti.
Rejısser Sergeı Snejkın Reseı kórermenderine Qazaqstannyń Tuńǵysh Prezıdenti týraly kınotýyndynyń besinshi bólimin túsirý jumysy týraly baıandap berdi.
– Bul fılm úsh saǵatqa sozylǵan úlken epıkalyq týyndy. Osynaý qatpary qalyń kúrdeli shyǵarmany biz orys-qazaq-nemis-koreı ujymy bolyp, amerıkalyq, aǵylshyn, qytaı jáne arab akterleriniń kómegimen eki jylǵa jýyq ýaqyt boıy túsirdik. Bul jumys – bizdiń maqtanyshymyz. 26 sáýirde Astanada ótken tusaýkeser rásimi meni qatty qýantty, óıtkeni qazaqstandyq kórermender týyndyny óte jyly, qyzyǵýshylyq tanyta otyryp, tamasha qarsy aldy. Bizdiń eńbegimiz zaıa bolmaı, qazaq halqynyń júreginen óz ornyn tapty degen sóz. Meniń aqparatym boıynsha, fılm kórermender tarapynan úlken qyzyǵýshylyq týdyryp, Qazaqstanda qyzý talqylanyp jatyr. Iаǵnı, kórkem fılm eshkimdi de selqos kózqarasta qaldyrmaıdy, – dedi Sergeı Snejkın.
– Bul jumys meniń Qazaqstanǵa, onyń halqy men Prezıdentine degen ystyq sezimderimniń dáleli bolyp tabylady. Fılmniń basty maqsaty – qazaq týraly ańyz jasaý, qazaqtyń kórkem obrazy men minez-qulqyn sýretteý. Jáne dál osy jaǵdaıda biz keıirker etip alǵan qazaqtyń búginde qyzmet etip jatqan minezi tańǵalarlyqtaı tereń, sanqyrly, úlgi alarlyqtaı naqty tulǵa ekendigi biz úshin úlken sáttilik. Nursultan Ábishuly – nıeti aq jáne óte adal adam, – dep qosty rejısser. Ol «Juldyzdar toǵysqanda» kórkem fılminiń tórt bólimnen turatyn keńeıtilgen televızııalyq nusqasy da jaryq kóretindigin qaperge saldy.
Basty róldi somdaǵan Berik Aıtjanov týyndyny túsirý barysynda óte qatty tolqyǵanyn tilge tıek etti.
– Nursultan Ábishuly Nazarbaev rólin somdaý men úshin úlken mártebe jáne úlken jaýapkershilik boldy. Búkil túsirý tobyn, sonyń ishinde bizdiń akterlerimizdiń jańa múmkindikterin ashqan Sergeı Olegovıch Snejkınge zor alǵysymdy bildiremin, – dedi ol. – Men úshin Elbasyn oınaý úlken mártebe ekendigin qaıtalap aıtqym keledi. Nátıjeniń qanshalyqty jaqsy bolyp shyqqandyǵyn bilmeımin, alaıda, biz qolymyzdan kelgenniń barlyǵyn isteýge tyrysyp baqtyq.
Jýrnalısterdiń suraqtaryna jaýap berý barysynda Arystanbek Muhamedıuly «Kóshbasshy joly» kınotýyndysynyń 1996 jyly Qazaqstannyń jańa elordasyn – Astana qalasyn salýǵa arnalatyn altynshy bólimin túsirý josparlarymen bólisti.
Buǵan deıin bolashaq Elbasynyń balalyq, jasóspirim jáne jastyq kezi týraly Rústem Ábdirashevtiń «Balalyq shaǵymnyń aspany», «Ot ózen», «Temirtaý» jáne «Tyǵyryqtan jol tapqan» atty fılmderi jaryq kórdi.
Besinshi bólimniń túsirilimderi 2015 jyldyń maýsymy men 2016 jyldyń qańtary aralyǵynda júrgizildi. Fılmniń negizgi oqıǵalarynyń biri – 1989 jyly oryn alǵan shahterler búligi Qaraǵandyda túsirilse, Astana mańynda Gorbachevtiń egindi alqapqa kelýi túsirildi. Qyzyqty aqparat: 1986 jylǵy Almaty qalasyndaǵy Jeltoqsan oqıǵasy qysqy Sankt-Peterbýrgte túsirilgen bolatyn. Bul epızodty túsirýge 600-den astam adam qatysty.
«Egemen-aqparat»