Maýsym aıynda Astanada áskerı orkestrlerdiń «Álem aspaby-2016» festıvali ótedi. Osy baıqaýda alǵash ret qazaqy naqyshtaǵy áýender shyrqalady.
Festıvalǵa Shanhaı yntymaqtastyq uıymyna múshe memleketterdiń áskerı orkestrleri qatysady. Bizdiń elden baıqaýǵa Qarýly Kúshterdiń ulttyq áskerı-patrıottyq ortalyǵy áskerı orkestriniń mýzykanttary qatysyp, sazgerlerimizdiń tanymal mýzykalyq shyǵarmalary men qazaqtyń halyq ánderinen quralǵan popýrrıdi aıtady.
Mýzykanttar repertýarynda «Dos-Muqasan» vokaldy-aspaptyq ansambliniń áýenderinen quralǵan popýrrı, halyq áni «Beles-beles», B.Jeldirbaevtiń «Shabyt shyńynda» atty shyǵarmalar bar. Odan basqa, ár eldiń áskerı orkestri 8-10 mınýttyq defıle usynady. Qazaqstandyq mýzykanttardyń jańa baǵdarlamasynda orkestrdiń ártisteri ǵana emes, qurmet qaraýyly rotasy men Qorǵanys mınıstrligi Ortalyq ansambliniń bıshileri de óner kórsetedi.
Festıvaldiń gala-konserti 8 maýsymda «Astana Opera» teatrynyń aldynda ótedi.
Dastan KENJALIN,
«Egemen Qazaqstan»