QOSTANAI. 20 mamyr. Qostanaı – Fedorov baǵytyndaǵy jolda, Shemınov selosy tusynda eki jeńil mashına soǵysyp qaldy. Eki kóliktiń de júrgizýshileri qaza tapty. Bul týraly oblystyq ishki ister departamenti baspasóz qyzmetine silteme jasaǵan egemen.kz tilshisi habarlady.
Hyundai markaly mashınany Reseıdegi Penza oblysynyń 46 jastaǵy azamaty júrgizip kele jatqan. «VAZ 2108» mashınasynda Shemınov selosynan shamaly jerde jatqan Ozernoe selosynyń 38 jastaǵy turǵyny otyr eken.
Oblystyq ishki ister departmamenti jergilikti polısııasynyń ınspektory, maıor Iýrıı Panasenko: «VAZ 2108» mashınasy júrgizýshisi oqıǵa ornynda qaza tapty, al Hyundai kóliginiń júrgizýshisi Qostanaı oblystyq aýrýhanasyna apara jatqanda «jedel járdem» mashınasynda úzildi», – dedi.
Jol apatynan zardap shekken VAZ 2108» mashınasynyń eki jolaýshysy aýrýhanaǵa jetkizildi. Olardyń biri 1975 jyly týǵan áıel, ekinshisi 1998 jyly týǵan jasóspirim. Qazir jol apatynyń sebepterin anyqtaý maqsatynda tergeý amaldary júrgizilýde.
Názıra Járimbetova.
Derek, foto: Qostanaı oblystyq ishki ister departamenti baspasóz qyzmeti.