ORAL. 18 mamyr. Batys Qazaqstanda bıýdjet qarjysyn jymqyrǵan balabaqsha dırektory sottaldy. Bul týraly batysnewskz.kz portalyna silteme jasaǵan egemen.kz tilshisi habarlady.
Oral qalalyq sotynyń úkimimen №20 «Balbóbek» mektepke deıingi uıymynyń dırektory A.Tólegenovaǵa qomaqty kólemde aıyppul salyndy. Ol Qylmystyq kodekstiń 189-baby 3-bólimi 2-tarmaǵyna sáıkes aıypty dep tanylyp, 55-baptyń 4-bólimi qoldanyla otyryp, múlkin tárkileýmen birge 5000 aılyq eseptik kórsetkish kóleminde aıyppul salyndy.
Batys Qazaqstan oblystyq prokýratýrasynyń baspasóz qyzmetinen túsken málimetke qaraǵanda, ol sondaı-aq, ómir boıyna memlekettik organdarda laýazymdy qyzmet atqarý quqyǵynan aıyryldy.
Oral qalalyq prokýratýrasy atalǵan balabaqshany tekserý barysynda bıýdjet qarajatyn jymqyrý deregin anyqtaǵan bolatyn. Atap aıtqanda, A.Tólegenova psıhologty formaldy túrde jumysqa qabyldaǵan. Oǵan munda múldem eńbek etpese de, 2014 jyldyń maýsymynan 2015 jylǵy qazan aıyna deıin 716 690 teńge negizsiz tólengen. Bul qarajatty dırektor óz qajetine jumsaǵan. Úkim zańdy kúshine engen joq.
Temir Qusaıyn.
Derek, foto: batysnewskz.kz.