ASTANA. 21 mamyr. Keshe Qazaqstan bas prokýrory Jaqyp Asanovtyń tóraǵalyq etýimen Bas prokýratýra janyndaǵy zańdylyqty qamtamasyz etý jónindegi konsýltatıvti keńestiń otyrysy bolyp ótti. Bul týraly Bas prokýratýranyń baspasóz qyzmeti deregine súıengen egemen.kz tilshisi habarlady.
Keńes barysynda bas prokýror jer máselesi jóninde resmı úndeý jarııalady.
Jaqyp Asanov óz sózinde kópshilikti arandatýshylardyń aranyna túsip qalmaýǵa shaqyrdy, ruqsatsyz kóshege shyqqandardyń qylmystyq jaýapkershilikke deıin tartylatynyn eskertti.
Bas prokýror jer daýyn kóshede emes, ústel basynda sheshýge memleket bar jaǵdaıdy jasap otyrǵanyn atap ótti. Úkimet janynan arnaıy komıssııa qurylyp, ol qazirgi kúnderi Jer kodeksiniń olqy jaqtaryn jan-jaqty talqyǵa salyp jatyr. Biraq, soǵan qaramastan, turǵyndardy qarsylyq aksııasyna shaqyryp, arandatyp júrgender kóp. Sondyqtan, ishki ister mınıstrligi áleýmettik jelilerdegi kúdikti degen azamattardy udaıy baqylaýǵa alǵan. Jurtqa kezekti ret úndeýin arnaǵan bas prokýror sherý uıymdastyrǵandar men oǵan qatysqandardyń jaýapqa tartylatynyn, tipti qylmystyq is qozǵalýy múmkin ekenin eskertti.
«Qazaqstan Respýblıkasy Prezıdentiniń 2016 jylǵy 6 mamyrdaǵy Jarlyǵymen Jer kodeksiniń keıbir normalaryn qoldanýǵa moratorıı jarııalandy, - dedi bas prokýror óz sózinde. - Memleket basshysynyń tapsyrmasymen Jer reformasy boıynsha komıssııa quryldy. Onyń quramyna azamattyq qoǵam ınstıtýttarynyń basshylary men belsendileri kirdi. Azamattar komıssııa jumysyna óńirlerde qurylǵan qoǵamdyq keńester arqyly da qatysa alady. Komıssııa otyrysynda pikir almasý barynsha ashyq. Onyń qyzmeti aqparat quraldarynda turaqty jarııalanýda. Arnaıy ashylǵan jerturaly.kz saıtynda qazaqstandyqtar óz suraqtaryn komıssııaǵa qoıyp, usynys-tilekterin bere alady».
Bas prokýror jer máselesi boıynsha kez-kelgen pikir bildirý úshin barlyq jaǵdaı jasalǵanyn atap ótti. Alaıda, keıbir adamdar osyndaı jaǵdaı men zań talaptaryn elemeı, ortaq dıalogtan qashyp, halyqty zańsyz qarsylyq aksııalaryna shaqyrǵanyn qoıatyn emes. Áleýmettik, ultaralyq arazdyqty qozdyrý úshin jalǵan aqparat ádeıi taratylýda. Mundaı áreketter Qazaqstan Respýblıkasynyń zańdaryna qaıshy keledi.
«Osyǵan baılanysty qoǵamdyq turaqtylyqty saqtaý úshin el azamattaryn mundaı arandatýǵa boı bermeýge, azamattyq ustanym men jaýapkershilik tanytýǵa shaqyramyn. «Prokýratýra týraly» Zańnyń 25-2 babyn basshylyqqa alyp, zańsyz mıtıngke shaqyrý, ony uıymdastyrý, tipti oǵan qatysýdyń ózi ákimshilik nemese qylmystyq jaýapkershilikke ákep soǵatynyn eskertemin», - dedi bas prokýror.
Talǵat Raıymbek.
Derek, foto: Qazaqstan Respýblıkasy Bas prokýratýrasynyń baspasóz qyzmeti.