KО́KShETAÝ. 21 mamyr. Aqmola oblysy, Arshaly aýdanynyń ortalyǵy - Arshaly kentinde Táýelsizdiktiń 25 jyldyǵyn merekeleý sheńberinde áleýmettik jaǵynan muqtaj turǵyndarǵa jańa 16 páterdiń kilti tabys etildi. Bul týraly oblystyq ishki saıasat basqarmasynyń baspasóz qyzmeti deregine súıengen egemen.kz tilshisi habarlady.
Osyǵan arnalǵan saltanatty jıyndy aýdan ákimi Azamat Taıjanov ashyp, qýanyshty oqıǵanyń jaı-japsaryn aıtyp berdi. Ol berilgeli turǵan jańa baspanalardyń endigi ıeleri kámelettik jasqa tolmaǵan 5 jetim bala, kóp balaly 2 otbasy jáne turmystary tómen 3 semıa ekenin atap ótti.
«Men búgin baspanaly bolǵanyma erekshe qýanyshtymyn. Shynymdy aıtsam, bulaı bolady dep tipti de oılaǵan emes edim. Endi eshteńege alańdamaı, otbasymmen baqytty ǵumyr keshemiz degen oıdamyz. Bizderge osyndaı qamqorlyq tanytyp jatqan memleketimizge myń alǵys», - dedi patronattyq otbasynyń tárbıelenýshisi O. Rıazanov basqosýda sóılegen sózinde.
Arshaly kentinde boı kótergen 16 páterli turǵyn úıdiń qurylysyna bıýdjetten 143 mıllıon teńge qarjy bólingen. Qurylys jumystaryn bas merdiger retinde «SK Gross» JShS atqarǵan.
Aýdan basshylarynyń aıtýlarynsha, úı barlyq talaptarǵa saı salynǵan. Onyń janynan avtoturaq pen balalar alańy jasalǵan.
Aýdan ákimi A. Taıjanov óz sózinde Prezıdent Nursultan Nazarbaevtyń baspananyń turǵyndar úshin qoljetimdi ári sapaly bolýyn únemi eskertip kele jatqanyn, memlekettik baǵdarlamanyń arqasynda qazaqstandyqtardyń birazy jylda baspanaly bolyp turatynyn atap ótti.
Baqbergen Amalbek.
Derek: Aqmola oblystyq ishki saıasat basqarmasynyń baspasóz qyzmeti.