Taraz memlekettik pedagogıkalyq ınstıtýtynda «Jalpy pedagogıka jáne psıhologııa» kafedrasynyń uıymdastyrýymen qazaq qyzynyń bolmysyn, beınesin, adamgershilik, rýhanı qundylyqtaryn qalyptastyrý maqsatynda «Búgingi qazaq qyzy. Siz qandaısyz?» taqyrybynda On-line respýblıkalyq cemınar-pikirtalas ótti.
– Jer betindegi kez kelgen halyqtyń óz aldyna ult bolyp uıysýyna, jeke halyq, egemen el, derbes memleket bolyp qalyptasýyna áıel-analardyń sińirer eńbegi orasan zor. Endeshe, urpaq tárbıesi, sonyń ishinde qyz bala tárbıesi – ulttyń taǵdyry. О́z urpaǵyna durys jol kórsete alǵan ult qana óz taǵdyryn ózi oıdaǵydaı qamdaı almaq, – deıdi bul jóninde atalmysh ınstıtýttyń jalpy pedagogıka jáne psıhologııa kafedrasynyń meńgerýshisi K.Buzaýbaqova.
Qazaqtar ádette elge kelin bolyp túsken qyz aýylynyń barlyq jaqsy qasıetterin, rýhanı-moraldyq qundylyqtaryn ózimen birge ala kelip, tabaldyryǵyn attaǵan bosaǵasynyń ıgiligine, qala berdi búkil elge sińirgen. Sondyqtan qyz tárbıeli bolsa, kelin ónegeli bolary anyq.
– Búgingi qyz bala tárbıesi qoǵamda ózekti máselelerdiń birine aınalyp otyr. Sebebi, ulttyń namysy, abyroıy qyz balanyń tárbıesine kelip tireledi, – deıdi Qazaq memlekettik qyzdar pedagogıkalyq ýnıversıteti pedagogıka jáne psıhologııa fakýltetiniń dekany, professor S.Jıenbaeva. – Qazirgi qazaq qyzy týraly sóz qozǵaǵanda, qazaq halqy qyz baladan ne kútedi? Qandaı maqsat qoıady? Ata-babamyz qyzdaryn qalaı ardaqtaǵan? Halqymyzdyń qyz balalar tárbıesiniń aldyna qoıǵan maqsaty – ulttyń aryn saqtaıtyn arýlar tárbıelep ósirý. Demek, «qyzǵa qyryq úıden tyıý» degen maqaldy ustana otyryp, boıjetkenniń tárbıesindegi talapqa, búkil qoǵam bolyp atsalysýymyz qajet.
Iá, shynynda qyz balanyń ádepten ozbaı, ınabatty bolǵany jaqsy. Ata-babalarymyz qyzdy jaqsy kórýdiń, qadirleýdiń ǵasyrlar boıy qalyptasyp qalǵan ózindik mentalıtetin saqtap, «myń ólip, myń tirilse» de ıgi dástúrden aınymaı, keler urpaqqa sony amanattaýmen kelgen.
– Qyzdyń bolashaq róline qaraı, «qyz – bolashaq jar», «qyz – aýyl ajary», «qyz – úıge qut», «qyzdyń joly jińishke», «qyz – jat jurttyq», «qyz – qylyǵymen súıkimdi», «qyzy bardyń nazy bar» degen sııaqty áleýmettik máselelermen ushtastyryp otyrǵan. Munyń ózi qyz balany ár kezde adal jar, abzal ana, áleýetti áje bolyp qalyptasýyna sebin tıgizeri daýsyz, – deıdi eńbek ardageri, ardaqty ana K.Qoıkenqyzy.
Semınarda «Jalpy pedagogıka jáne psıhologııa» kafedrasynyń aǵa oqytýshylary, pedagogıka magıstri S.Bópetaeva, J.Kúmisbekova, sondaı-aq, Q.Jubanov atyndaǵy Aqtóbe óńirlik memlekettik ýnıversıteti jalpy pedagogıka jáne psıhologııa kafedrasynyń meńgerýshisi J.Júsipova jáne basqa da ustazdar, stýdentter óz oılaryn ortaǵa saldy.
Seısekúl KО́ShIMBETOVA,
pedagogıka ǵylymdarynyń kandıdaty, dosent
TARAZ