Konstıtýsııalyq keńes óz uıǵarymyn bildirdi

Ata Zańǵa ózgerister men tolyqtyrýlar engizý jónindegi Parlament qabyldaǵan zańnyń Konstıtýsııaǵa sáıkestigin tekserý týraly Prezıdent Nursultan Nazar­baev­tyń ótinishin óndiriske qabyldaǵan Kons­tı­týsııalyq Keńes keshe ózindik uıǵarym jasady. Ústimizdegi jyly Parlament pala­ta­la­ry óziniń birlesken otyrysynda respýblıka halqynyń pikirin qoldap, Qazaqstan Res­pýblıkasynyń Tuńǵysh Prezıdenti N. Nazarbaevtyń prezıdenttik ókilettigin uzar­tý merzimin kózdeıtin Konstıtýsııaǵa ózgeris engizý týraly zań jobasyn tal­qylap, qabyldady. Ol Zań Prezıdent qa­raýyna jiberildi. Al Prezıdent onyń Ata Zańǵa sáıkestigin tekserýdi Konstı­tý­sııa­lyq Keńeske júktedi. Konstıtýsııalyq Keńes óz kezeginde jı­naq­talǵan zańdy qujattardy saralaı kele Parlament qabyldap, Prezıdenttiń qol qoıýyna usynylǵan «Qazaqstan Respýblı­ka­synyń Konstıtýsııasyna ózgeris pen to­lyqtyrý engizý týraly» Zańyn el Kons­tıtýsııasyna sáıkes emes dep tapty. Sóı­tip endi ol zańǵa qol qoıylmaıdy jáne ol qol­danysqa engizilmeıdi jáne shaǵym­da­nýǵa jatpaıtyn boldy. Osyǵan oraı atalǵan normatıvtik qaýlynyń mán-jáıin Konstıtý­sııalyq Keńes Tóraǵasy I.Rogov qysqasha túsindirip berdi. Konstıtýsııalyq Keńestiń paıymdaýyn­sha, Konstıtýsııa respýblıkalyq referen­dým­dy halyqtyń óz bıligin tikeleı júzege asyrýynyń nysany jáne memleket ómi­riniń asa mańyzdy máselelerin sheshýdiń demo­kratııalyq ádisi dep aıqyndaıdy, demek, Tuńǵysh Prezıdenttiń – Elbasynyń pre­zı­denttik ókilettigin uzartý da osyndaı másele bolýy múmkin. Parlament óziniń kons­tıtýsııalyq ókilettigi negizinde Memleket basshysynyń prezıdenttik ókilet­tigin res­pýblıkalyq referendýmda uzartý jóninde halyqtyń erik bildirýin qamtama­syz etýge quqyqtyq negiz jasaýǵa tıis bolatyn Zańdy qabyldady. Alaıda, Zańdy zerdeleý barysynda Konstıtýsııalyq Keńes bul Zańnyń Prezı­denttiń ókilettigin uzartýdy kózdeıtin nor­masy zańdyq turǵydan dál jazylmaǵanyn anyqtady. Zańnyń 1-tarmaǵynan Qazaqstan Respýblıkasy Tuńǵysh Prezıdentiniń – El­basynyń prezıdenttik ókilettigi qaı merzimge uzartylatyny baıqalmaıdy, mundaı uzar­týdyń bir jolǵy álde qaıtalanatyn sıpatta bolatyny, ne bolmasa Memleket basshysyn saılaýdan tolyǵymen bas tartý kózdeletini anyq emes. Osy konstıtýsııalyq normanyń anyq jazylmaýy Konstıtýsııada kózdelgen memlekettik jáne qoǵamdyq ınstıtýttardyń tájirıbe júzinde úılespeýshiligine ákelip soq­tyrýy múmkin. Sondyqtan, el Prezı­den­tiniń Parla­ment qabyldaǵan zańnyń konstı­tý­sııa­lyǵyna kúmán keltirýi ábden negizdi bolyp shyqty dep atap ótýge bo­lady. Kons­tı­týsııalyq Keńes bul zańdy Konstıtýsııaǵa sáıkes emes dep tapty. Aleksandr TASBOLATOV.