Parlament Senatynyń Tóraǵasy Qasym-Jomart Toqaev «Dinder terrorızmge qarsy» halyqaralyq konferensııaǵa kelgen delegasııalarmen ekijaqty kezdesýler ótkizdi, dep habarlady Senattyń baspasóz qyzmeti.
Atap aıtqanda, Q.Toqaev Avstrııa Federaldyq Parlamenti Ulttyq keńesiniń depýtaty, EQYU Parlamenttik Assambleıasynyń Vıse-prezıdenti Krıstın Mýttonenmen jáne EQYU PA Bas hatshysy Roberto Montellamen, Latvııa Respýblıkasynyń Seımi Tóraǵasynyń orynbasary Inesa Lıbınıa-Egnere men Ulybrıtanııa jáne Soltústik Irlandııa Birikken Koroldigi Parlamenti Lordtar palatasynyń múshesi Mohammed Iltaf Sheıhpen, Shvesııa Koroldigi Rıksdag depýtaty Kent Harstedtpen áńgimelesti.
Sheteldik meımandar 31 mamyrdaǵy «Dinder terrorızmge qarsy» konferensııasynyń mańyzdylyǵyn atap ótip, terrorızmmen jáne ekstremızmmen kúrestegi jahandyq turǵydaǵy kúsh-jigerge forým laıyqty úles qosatynyna senim bildirdi. Parlamentshiler men álemdegi dinı qaıratkerlerdi bir alańǵa alǵash ret jınaǵan konferensııanyń ereksheligine aıryqsha nazar aýdaryldy.
Q.Toqaev júzdesýshilerdi «100 naqty qadam» Ult Josparyn iske asyrý aıasyndaǵy aýqymdy ınstıtýttyq reformalardy júzege asyrý týraly habardar etip, forýmǵa qatysqany úshin meımandarǵa rızashylyǵyn bildirdi.