Memleket basshysy Nursultan Nazarbaev «Astana EKSPO-2017» ulttyq kompanııasy» AQ basqarmasynyń tóraǵasy Ahmetjan Esimovti qabyldady, dep habarlady Prezıdenttiń baspasóz qyzmeti.
Kezdesýde A.Esimov Memleket basshysyna EKSPO-2017 halyqaralyq kórmesine daıyndyq, sondaı-aq, onyń mazmundyq turǵydan jabdyqtalýy jóninde baıandady.
«Astana EKSPO-2017» ulttyq kompanııasy» AQ basqarmasynyń tóraǵasy qurylys jumystary kestege sáıkes júrip jatqanyn aıtty. Qazirgi kezde 87 el jáne 15 halyqaralyq uıym kórmege qatysatynyn rastaǵan.
Kórme taqyrybyn ashatyn taqyryptyq nysannyń biri «Úzdik tájirıbeler aımaǵy» pavılony bolmaq. Bul aımaqta qatysýshylar energetıka salasyndaǵy jetistikterin kórsetip qana qoımaı, tehnologııalardy, strategııalar men jobalardy ilgeriletý turǵysynda pikir jáne tájirıbe almasýǵa múmkindik alady dep josparlanyp otyr.
Qazaqstan Prezıdenti keıinnen Qazaqstan pavılonyn Bolashaqtyń mýzeıiniń negizi retinde paıdalanýǵa múmkindik beretin kórme kontentiniń sapaly bolýy úshin halyqaralyq tájirıbeni qoldanýdyń mańyzdylyǵyna nazar aýdardy.
Sýretterdi túsirgender
S.BONDARENKO, B.OTARBAEV